（一）（利源）東陷〔利源東〕
踏入4月20日穀雨之後內心時不時有種（壓迫）感，總覺得在立夏前半個月內會有啲不祥預兆發生。事關每年（清明）與（立夏）嘅春夏節令交替之間正係新舊兩年之正式交接期，換句話講每年點都要過埋個（春）之後、舊歲之餘氣先全可以話完全隱退收旗。舉凡新舊歲時間、空間（簡稱：時空）交替緊之春天、若然有政經大事進行嘅時候，復見到有（典型相關）災劫發生，玄學謂之：〔時空神兆機動〕、多數預兆未來將有禍事隨住降臨，就算發生嘅係小災小劫、只要觸及相關時間、空間及人物，幾難會安然無咎而冇事發生，呢啲徵驗屢見不爽。假若再加埋新舊兩年流年八字再有連貫性嘅刑沖的話，咁就更加大鑊！
記得毛主席曾經有句出名歇後語：〔天要下雨娘要嫁人〕，意思係話禍事若要嚟時終歸會嚟，逃亦逃不了避亦避不過……。大家都記得舊年流年（辰戌冲），正係香港特區之（九龍）應數（狗龍相沖）而犯煞，意外由年頭帶到年尾，猶其九鐵、九巴兩間公司中正招，甚至地底挖出炸彈也有幾鑊之多……。咪唔記得今年流年係（巳亥冲）豬蛇之沖，玄機上係（龍蛇混雜犯太歲）。咁啱得咁橋今年豬年香港特區又剛啱完成咗（欽點）特首大事。
既然香港特區今年響沖頭沖尾嘅時候（換特首）都咪話唔牙煙，所以響文章開首我話內心有種（壓迫）感就係噉原故。因為唔放心、早前特登開個盤想睇清楚，不睇猶是可、一睇之下更加得人驚，事關清明節令斗數飛星盤：年（天相）本來左右被巨門化忌、天梁（刑忌）所夾，月令復見太陽化忌會照巨門化忌而強化忌星，（穀雨）之後、（清明）尚未退氣惟（立夏）氣先進，下月太陰化忌又順勢湊在一起。星數既然如此（烏忌白忌）於（時空），當時心諗：最好靈靈性性過埋清明，假如有乜頭暈身㷫事發生嘅話，本地唔知又會（衰邊泛）矣！
點知話口未完，4月24日中午，港島中環利源東街一個地盤旁邊卻發生地陷事故，路面五個小販攤檔連同地盤雜物下陷，4人受傷……。本來香港事故日日都有發生唔值得大驚小怪，唯獨呢單事故卻大大不同。點解呢？因為呢庶係〔香港禮賓府〕目前〔特首辦〕落脈（結穴）之地（唔信？你可以實地去勘察）。〔香港禮賓府亦即現時特首辦〕位於中環上亞厘畢道（正門朝南，面向太平山），正線向則北走落山沿：皇后大道中、德輔道中、干諾道中……而向正國際金融中心二期〔金融管理局〕，繼而再朝〔六號碼頭〕出海。（龍峯向水）中段落脈（結穴）之地正正係皇后大道中與德輔道中之間嘅〔利源東街〕。
由於呢條街係港英時代〔港督府〕、回歸後〔禮賓府〕嘅（穴位），噉即係名符其實之（風水地）。若然關係到〔港督府〕、早已經過哂氣可以不理，牽涉到〔禮賓府〕亦無關痛癢可以話之佢，弊就弊在呢庶家陣係〔特首辦〕，仲有係新一任嘅（特首）還未曾正式就職、佢個（風水結穴地）就先行落陷而要（填氹），你話該唔該（煨）？唔着緊就勢係假！如果〔特首〕未（欽點）只不過一年半載貨仔可以不理，家陣唔係喎，剛啱先至欽點）完、至少還有五年日子挨，任期內真係唔知衰邊泛？唯一值得安慰可以（賴）新任特首尚未曾正式就職，衰至多衰舊時嗰個。哈哈！舊時嗰個係乜水呢？
或許有人問，你估家陣個特首會唔會好似（老古董）咁埋唔倒尾？呢層真係認真難講。至於今次（地陷要填氹）除咗剛啱先至（欽點）完特首、更加係（回歸）十周年慶典前夕，照依家坐〔特首辦〕向〔金融管理局〕嘅風水座向嚟論斷，話之你特區政府先前為現時之〔特首辦〕造盡一切搬碼頭、拆鐘樓……等等清除風水障礙功夫，今勻（利源）東陷〔利源東〕嘅（時空神兆機動）好大機會先驗證響財經方面出事先。事關（利源）即係（財源），神兆機動好明顯應驗於（財源）東陷〔利源東〕。因循呢種〔玄機大象〕之效應，目前一眾瞓身響股市嘅散戶千祈咪（烏卒卒）掉以輕心，有起事上嚟分分鐘走唔切。
（二）〔無厘頭〕變字遊戲
最近有不少讀者、親戚、朋友……問我曾否聽聞過甚或認識（熱爆人物）陳振聰，同時對即將爆發的〔龔如心遺產〕爭奪戰有何玄機方面的啟示？我的答案是：〔和大家一樣、除了近期由傳播界耳濡目染之外，以前從未聽過陳振聰此人的名字、更遑論認識矣！至於要我預測〔龔如心遺產〕爭奪戰的結果，也由於（靈感空虛）之故，一時間未能瀟灑自如觸機判事……不談此事也罷！〕。
閒來無事不妨提供一個益智〔無厘頭變字遊戲〕以娛樂大眾，有興趣乎？如果有問此遊戲是否有玄機？可以告訴你：〔你可以將整個變字遊戲過程看成一個人或者一件事的來龍去脈分析和預測將來結果，至於當中玄機由你個人去自由發揮想象力〕。
橫豎說開了全城最熱門的（遺囑）話題，就隨手捻起「華懋」二字作「變字遊戲」的開始吧！「華懋」兩個字，「華」係公，「懋」係乸。就當個公（消失）了而遺下個乸在世。變字開始首先必須將個公所屬「華」字上面之「草花頭」摘下而配套上個「懋」字應用（遊戲規則不容許不用）。不用猶是可，一用就有「戲法」變出……，大家落足眼力睇噃，嗱！是否見到個「懋」字拆開咗變成了「茅」「木」「木」「心」四個字？大家一定對「木」字加下面個「心」字似曾相識？不錯，正是個「想」字，兩旁雙「木」加一「心」本來就係兩個「想」字，亦可以喻之：左「想」右「想」。唯獨現在個「想」字卻不成字，究其原因大家明眼可以見到係個「茅」字做了（障眼）功夫而硬將雙「目」蔽去，既然缺了「目」又如何能成「想」字呢？是以：左既難成「想」右亦不能成「想」，縱使有「心」亦無法成「想」〔說到這裡忽然醒起今年紫微斗數也是（刑忌夾印）：一旁天梁、一旁巨門化忌夾（天相）、恰好是有（木）而缺了（目）〕。再看「茅」兩旁雙「木」，左「十八」右「十八」合共「三十六」。「三十六」者大家耳熟能詳自然聯想到「計」字，更加會聯上個「茅」字讀、讀成「茅計」或「計茅」甚至「茅術」。「三十六」計我不諳熟，只記得其中最後一計是「走為上着」。再睇個「心」字，由始至終不管上面如何變法，下面個「心」字都沒有變、同是「三點」聯結而成一「心」，若然個「心」字一變的話，「變字遊戲」就肯定要結束矣。
大家覺得這個〔無厘頭變字遊戲〕好「玩」否？有時間自己也可以將一組字拆開來「玩」兼且自由發揮想象力。若然問我當中是否含有玄機或影射？我可以肯定答覆你：〔沒有，絕對沒有！〕