恒指有望創新高，豬公此劫恐難逃
幾個多年好友年中又再聚首共進晚餐，閑話世事及城中新聞，這樣的聚會已經連續了多年，也是五十年不變地光顧同一家酒樓。今年（豬年）是第一次，對上那次是去年（犬歲）年尾吃團年飯。
今勻開了間小房間餐聚，大家入席彼此寒喧過之後，還是多說話的A君打開了話閘：〔喂！老吳，記得吃團年飯時話過：學府出事係意料中事……結果羅太縱使過檔咗廉記亦一樣避唔過一劫。跟住你仲話：今年豬蛇之沖，玄機上係龍蛇混雜犯太歲……還有公仔箱及空中發音機構……等等，今年肯定多麻煩事……結果挨完貴豬肉之後，又輪到廣播處長（朱培慶）因溝女俾人斷正而周身蟻，已向政府表明希望盡早離職……咩都同（豬）扯上關係，真係應咗老吳你把（烏鴉口）！你哋估呢位仁兄可唔可以玩埋出年退休至執包袱？〕〔俾着你做曾蔭權，你敢唔敢留佢呀？〕素來穩重而不苟言笑的B君瞪了他一眼。〔冇厘分析能力，嘻嘻！〕喜歡與A君抬貢的C君見有對他〔抽秤〕之機會而豈容錯過？A君則回他一個鬼臉。〔呢位仁兄真係冇厘大將風度、枉佢做到廣播處長……〕平時不多說話做財經的D君開腔說道：〔如果係我俾記者影到相，幾大都大大方方認親認戚、仲介紹埋個靚女俾記者認識添！萬大事情日後至分辯，使乜絲絲縮縮辣埋喺人身後咁羞家！〕，B君接續話題：〔此君唔單止冇大將風度，更加冇政治智慧，出政府份糧卻事事同政府唱對臺戲、仲支持整個機構脫離政府獨立，擺明做個（榜樣）俾其他政府部門和愛國（機構）睇。既然咁大義凜然講民主就應該凡事小心翼翼，咪俾人（僕）倒而揸住痛腳先至係醒。我睇事情唔似辭職就可以了事，除咗佢自己手尾長之外，成個機構有可能自此盡廢武功添！否則老吳所預測之（空中發音機構）多麻煩事……係咁簡單就確係奇咯！老吳，你話係冇？〕〔我認同你所講，試睇下本月巨門雙化忌夾天相、太陰雙化祿盡奪太陽光暉……我已經喺月令運程預測咗：月內翻查舊帳事件而爆醜聞事件更加普遍見於世界各地政界和上流社會，不同國家地方上由首相、財相、高官，下至機構首腦、總裁……等等管理階層有意外發生，或因政變和鬧爆醜而引咎下臺，出事者以男性居多……睇怕唔止（香港電臺）一單就了事，驚住（三水佬睇走馬燈）仲陸續有嚟……〕我答道：〔講開又講，你哋話呢位仁兄冇風度冇智慧……淨睇個相就有版可以驗證啦！試望下佢：成對眼眼尾耷垂而配上（覆舟嘴），嘴細而無菱又無角，再襯上倒三角臉形，除咗顴鼻一氣呵成尚有可取之外，其餘一無是處，明年六十歲交入嘴運開始冇運行，今年唔出事先應數至係奇……〕〔睇佢副尊容，寒寒酸酸咁，脫咗西裝成個餐廳企堂款……〕這時候輪到說話刻薄的C君搭腔。〔似喃嘸佬多啲！〕Ａ君咪咪嘴接道，〔我話似當舖二叔公多！〕D君接續說話時、早已笑得見牙不見眼。於是乎大家你一言我一語，嘻嘻……哈哈……笑個不停。
這時候有位靚女部長走進來打招呼、也是大家相熟的，〔有咩嘢咁好笑？〕她笑笑口問道，邊說邊去調較電視……〔靚女，我哋今日談論世事唔睇電視……〕A君瞇着笑眼對她說，隨即白了一眼欲有所言的C君：〔又想多說話咧，哼哼！〕〔我乜都冇講噃，你份人真箇作賊心虛！〕C君笑罵回他。靚女部長微笑嗔了他們一眼，接着向D君問道：〔最近個市點睇呀，股王？〕〔豈敢稱股王，呢輪咁升法，真係要靠估……何不問問大師？〕D君答道，隨而將話題擲給我。〔人家問你你又將太極耍向我，我係神仙咩！〕我回道，但見五個人拾雙眼帶着懇切神彩投向我身上、不忍推卻：〔嗱！先旨聲明，今次預測係（共同觸機），好醜自負。〕〔……〕眾人不明我所言，我續道：〔意思係起支（梅花易）大家共同參詳……不妨先由阿B翕兩個數字起卦〕，B君略為思考道：〔目前指數已接近二萬三千點，就用（23）兩個冧把吧！〕〔嘻嘻嘻！二三更瓜老襯輸到我木……〕A君聞後得意洋洋地唱起鄭君綿嗰首名歌《賭仔自嘆》，逗得一眾人等又大笑一番。〔好啦！（23）喺飛星數係（鬥牛煞）係應打交、嗌交、官司…..數，既然翕咗出就冇得改。2為（兌.）卦，3屬（離）卦，23組成（澤火革）卦……〕我邊沉吟邊計算：〔2加3等於5，依家未到戌時仲係酉時，由子起1計、即係再加10，總數15而除6、剩餘……由（澤火革）離下初爻往上數三，變卦（震）而成（澤雷隨）……間爻則成（天風姤）。用神取（震木）及間卦（巽木）為（財星），加上乾兌金將進氣而有力劈木任財……咦！支卦同我去年秋天所占那支而在〈涼風有信，秋月無邊〉一文刋出之梅花易大同小異喎，唔唔……個股市好似冇咁快壽終正寢噃！〕〔係唔係真架？！〕眾人眉開眼笑幾乎異口同聲而發問，還是 D君較冷靜，到底係財經界中人：〔喂！唔多合邏輯噃，最近好多大公司都叫人執生喎！〕我答道：〔呢層就唔知la！支卦係大家觸機而占得，又唔係我起嘅〕〔你不妨解下卦先〕B君對我說。〔最簡單不過啦！記得我去年秋天所占之卦亦係（澤火革），只不過上次係變第五爻而成（雷火豐），而間卦一成不變還是（天風垢）。占卦所問嘅事仍然係：未來股市走勢吉凶。之不過今次支卦變咗（兌卦）為體，（震卦）為後天用神之（財星）而矣……〕我繼續侃侃而談：〔分析今次呢支卦easyjop啦！只要將上次嗰支略作修改就可以照版煮碗就可窺全豹：視為（恆生指數）之離火因有震巽木生而不會在短期內全面熸滅，指數最多不過整固待變而將會繼續上升。其動力來自（震木）輔以（巽木），兩種木均屬（青龍）而旺東方，木被金所劈必亂而走偏鋒，不言而喻大家都知道目前入市資金：東來炒作之（對沖基金）佔咗大部份，（國內資金）也應該不在少數，至於間卦（巽木）巽主風、市場中還有些來也速時去也速的遊資。對上支卦用神亦係（震木），不同的是上次震木為（印星）、今次震木為（財星）。另外不同的是：上一支卦體係（離卦）主文明、謹慎，呢一支卦體係（兌卦）主喜悅、忘形。上次（印星）主催谷，今次（財星）主穫利。上次曾經提及到（震卦）本身有（天打雷劈）之徵象、所含（虛驚）的味道極濃。隨着投機活動熾熱至白熱化程度，再加上今勻（震卦）財星為用神，無可避免地未來本地股市的波幅肯定進一步擴大，分分鐘瞬雷不及掩耳地將投資者手中貨源一概（震走），跌至幾近谷底先至反彈。如是者幾上幾落而完成（牛市）末期之過程，個市先至宣告壽終正寢。〕
眾人聞我分析卦象之後、均流露出嘆服夾雜喜悅的眼神，猶其靚女部長眼中神彩更加閃爍着一絲絲桃花艷光，〔靚女部長，莫非好事近矣？〕我向她問道，〔係呀！打算秋後結婚〕她含羞回答。〔哎喲走寳！〕A君聞後失驚無神拍檯大作惋惜狀，C君少不免又緊接着出言挪揄他：〔入直路嗻，依家休妻追上仲嚟得切格！〕，大家七嘴八舌又樂個不了。