諗到25都怕怕
早二日有位財經界朋友陳君嚟光顧睇流年，佢就威啦！大半年下來響股市贃咗幾近九位數字真銀。睇完命之後大家「嗲」番幾句，話題自然離唔開股市之走勢。
「大師，你點睇超人與四叔兩位富豪（睇定先）和（二萬五）嘅不同話法？」陳君問，「兩人嘅觀點與預測都有道理，四叔嘅（二萬五）肯定會到位甚至更上一層樓，而超人嘅忠告卻千祈咪當佢嗡風」我答道「之不過提及（二五）兩個數目都未免令人有啲心驚肉跳」陳君聞後不解而笑問：「何解呢，莫非又有玄機乎？」我慢條斯理地斟咗杯水呷了一啖而答道：「唉！你唔知風水學最大忌係25交加咩？呢對組合數好有機會置人於死地，一個唔覺意分分鐘會死人兼冧樓架！其次係……你有冇聽過紅軍二萬五千里長征呢？」陳君答：「25交加都聽過下，真係會咁大鑊咩？」陳君聞後略縐眉頭，似有不解「至於紅軍二萬五千里長征點又會唔知呢，我以前係響上面讀書嘛……吾吾！又關長征乜事呢？」
「紅軍二萬五千里長征，從長江南北各根據地向陝北革命根據地進行的戰略大轉移歷時兩年，行程二萬五千里，過程中犧牲咗幾多戰士，幾多人成了烈士你都知架！」我有感而發：「須知道股場如戰場，指數幾千點上落之間恰似（三國演義）嗰段開場白：滾滾長江東逝水浪花不知淘盡多少股壇英雄呀！」，「哈哈！真嘅英雄係大鱷，點會俾浪花濕到身呀，淘盡嘅不過係一眾（盲無）而矣！」陳君笑道「以我多年炒股經驗睇，非常贊同你所講、今次指數咪話會輕易炒上二萬五，就係三萬亦濕濕碎，我至今亦明解你（二五）嘅含義，到時唔知又再犧牲幾多（盲無）先至到位。須知道股市若然只有升而唔會跌嘅話，除非閻羅王做莊啦！」，我聽後不禁咭地笑出聲：「真係聽鬼買咯！」陳君繼續說：「專業炒股嘅手段係先要有學識、其次係營造消息、第三係講膽色……第四，嘻嘻！應該學曉你哋呢行睇氣 色咯！」，我聞後點頭莞爾：「講開又講，有個疑問想請教你，係就係話上頭大開水閘排洪准啲國民落嚟投機股市，但係資金未到個市已經顛定先，唔怕如你所講一眾國內同胞變（盲無）嚟接火棒咩？」，陳君陰陰嘴答道：「你唔記得閣下頭先講過（二五）數目嘅偉論乎？既然上頭政策只係吹水階段而尚未完全落實、個水閘自然唔會開掣。你唔俾本地及其他外來（盲無）以為鴻鵠將至而將個市炒到（二五）邊緣，然後再嚟一次插水式大跌市，嗰陣上頭先至開閘放水，啲資金才施施然行到步掃貨，中意嗰隻揀嗰隻……仲有，咪唔記得美國嗰頭（次按危機）有排都未掂架！」，「唉！睇怕我最近刋出嗰篇文章內文所講：支卦用神係甲木（震卦），本身有（天打雷劈）之徵象、所含（虛驚）的味道極濃……分分鐘瞬雷不及掩耳地將投資者手中貨源一概（震走），跌至幾近谷底先至反彈。如是者幾上幾落而完成（牛市）末期之過程，個市先至宣告壽終正寢……有機會再次應驗，事關農曆八月（己酉）天干己土合甲木、地支酉金劈木根，再加上月令文曲化忌沖會刑忌夾印……唔怪得超人有（睇定先）嘅忠告啦！」我似有所悟而嘆道「話得講回頭，玄機預測呢味嘢末必百分百，我極之希望跌眼鏡」，「跌眼鏡普渡眾生呀嘛，誠你貴願啦，哈哈！大佬，我都揸重貨架……總之我會認真記住你嘅（二五）理論，好嘞傾到呢度先下次再續緣」，陳君望下隻錶、話夠鐘有約會而先行別過。