既然已過春分氣，來月清明有玄機
執筆時中氣已過咗春分，寓意春天分野棄舊迎新，蛇年「巳酉丑」至此煙消雲散，蛇雞牛嘅舊組合將被寅午戌「虎馬犬」取替。
既然中節氣已過春分，即係話陽氣增長而陰精收斂。舉凡燥熱底子嘅人此刻飲食要多加小心，事關天氣開始濕夾熱，自問燥熱底子人士（包括我自己在內），不宜再貪圖口爽而頻密進食煎炸熱毒或生冷食物。事關春夏之交正值農產品青黃不接，而嶺南地區當造嘅菜蔬水產係“三黃”。“三黃”
係指黃瓜、黃鱔、黃魚。由於濕熱係廣東氣候特點，“三黃出陣”的那段日子，正是人一年中最感煩悶、燥熱、疲乏……的時候。呢個時候，潛伏體內之陰陽氣流响節令交替之際拼個你死我活，結果陽盛陰衰、陰陽失調，借咁意將整個冬天積積埋埋嘅熱毒冚辦爛發哂出嚟，所謂「濕滯」症候群乃泛指喱啲。遇上金水流年仲好受啲，碰啱好似今年火旺燒通頂流年，木馬生火燒金焦土，心肝脾肺腎正常嘅人都有不適，本身熱底陰虛、脾虛之一族、佢哋更衰多兩錢重。
講到火剋金我去年年尾響《新玄機》寫過一篇文章，節錄部分回味下玄機：今年癸巳，因巳蛇緣故、使人不期然聯想到：巳(禽)，酉(雞)，丑(牛)，組成嘅兌金金局。還記得仲夏英婦撞死八隻牛嗎？如果仲係【巳酉丑】當令的話，說不定事件會改寫成「八牛撞死英國婆」。感慨年內仲夏英婦撞死八隻牛之後幾個月，秋天菲律賓風災，立冬泰國大示威，東海風雲……等等都沖正東南亞（辰巽巳）而來。（巳酉丑）巳丑已驗災難數，唯獨酉雞至今尚太平。睇番過往紀錄、今年殺雞捉雞次數明顯少咗。既然會局下衰就要齊齊衰，有理由你隻吉品平安大吉嘅！所以整單兌金怪雞事作楔子應數，其後陸續帶出咩嘢大鑊嘢就不得而知矣！（巳酉丑）癸巳年，癸巳日，亥月沖雙巳、去一留其一。沖散酉金入丑墓，巳火乘機栓門戶。酉金既然投墓庫，凶多吉少仲使估……。
來來去去問題仍然環繞馬蛇新舊年巳酉丑嘅酉金，馬年流年八字全盤木火旺而偏偏辛金瑟縮一角有如長空孤鐵……驚蟄月丁卯、丁火飈升傷金焚鐵架馬拉客機在太陽巨門俱化忌嘅月令，加上刑忌夾天相，在咁嘅「時空」玄機之下，殘骸搵得返、真相能大白……咁就真係奇矣。3月22日春分過後陽巨勃然而起季春月月亮亦退氣，到咗清明月天機化忌之際，馬航殘骸肯定唔使點操勞都會自然蒲頭。
記得三星期前某天，我無情白事忽然打咗個冷顫、腦海裡浮起：「馬拉松、馬拉榚、馬拉盞、馬拉雞」。啊！係：馬拉雞喇！「午酉卯」午馬、酉雞、卯月……三刑逢沖沖咗馬拉隻飛雞。
講完飛機講玄機，今年廉貞化祿，太陽化忌，意味住國內倡廉反腐運動將進一步升溫。查實東方紅太陽升，大前題本來係一個造勢，凝聚中國甚至亞洲黃種人腦波磁場於東方太陽焦點，潛意識太陽不滅必須不停革命。但家陣國內清算石油系，刻意打遏變了質嘅太陽高層保護網。甲午年太陽化忌，石油系被清算大火更難燃得烈……無陽光無烈火的日子，東方斷估不復紅、太陽不復升。年內亞洲肯定一波三劫，猶其清明後五黃飛東南，東南亞將無處是樂土。
話題一轉講番人仔，早輪有個中大附小靚女嚟幫襯，由於肚裏人仔個老竇即係佢老公唔生性，響上頭柄埋個二奶，自此之後靚女對於大陸一切，一刀切地深惡痛絕……免得過乜輪國產、不論食得唔食得都唔買唔用。批完命之後靚女遞上幾張金牛等找贖……話都冇咁橋嗰日我袋中係哂人仔而冇港幣，如是者唯有明益佢找番人仔。誰知靚女一望到老毛幅相立刻歇斯底里咁高叫：我唔要人仔！我定神一聽；暗叫不妙……事隔幾個星期，靚女打電話話我知佢不幸流產，人仔保唔住，一語成籤！
後話：唔通最近人仔匯價跌多過升唔通係畀個婆娘咒衰嘅？