天梁化祿火旺地，陽巨化忌陷子宮
「吳老師，你寫過梁振英有如關羽走麥城朱棣囚燕京，財流東海、死過翻生。事業發圍而財豐祿厚、唯獨奔波勞頓不免。或許攀龍跨鳳青雲有路，只恐南北風雨窒礙仕途……即係點嗻，能否大歩檻過？」有個廣州公務員賴鐵鋒專誠落嚟請教流年運程，佢係國土收租佬，識咗好耐、裸官。
「好難講，篇文寫咗有兩年，話就話佢時柱丁丑 60前犯伏吟要行埋2013先至甩難，唯獨 2014甲午佢進入六十有一而犯足太歲。」我有多少無奈繼續說話：「佢今年斗數坐天梁化祿午垣，面對太陽化忌子宮……」。喱個時候關兄笑問道：「太陽化忌入子宮？」我答：「咪即係甲午重叠紅太陽馬上風，周永康石油系魂斷仙人洞？」我語含蓄帶玄機陰陰嘴說下去：「梁凸首今年初入戊寅運，本來傷官配印權傾南地權力延伸至你哋地頭，事關廣州上頭十官九落鑊，池中無魚至大……哈哈！無奈佢年犯太歲而火水未濟，牽動全局金寒水冷火氣熸下，家中火水末濟，女兒作反。社會陰精司權受開發大嶼山白虎地所累，被美英帝國有機可乘，男兒為國家條 nine無 deng掛，揈下、揈下，受盡學生、青少年和一眾地產富豪……追殺……」
賴兄聞我說話不禁失聲笑出：「嘻嘻！X揈揈……」。我繼續：「佢今年直情大輪鑊，絕不好過。年命天梁化祿守午垣，對住陽巨化忌遷移子宮，加上丁丑大運餘氣未全退，流年太歲緊貼追隨，一眾外國勢力介入玩嘢。最驟忌富豪地產群中冇邊個妥佢、說不定……所以佔中運動九成九冲佢而嚟，爭取普選不過幌子而已。睇怕佢今年幾難捱！」
賴兄：「上頭有單項目牽涉到佢，想睇佢死唔死得？」我答：「定啦！唔死得。」繼續：「天梁化祿命宮，即係姓梁嘅木咀年内周身蟻。陽具化忌入子宫，英國流年不振佢又點會振，打軟鞭令家庭失和諧。年内五行地支午火得勢•年支會火後臺堅挺，過咗立冬保證平安無事。」