殺旺無制性狂野，廉貞化忌業見血

有位風韻猶存靚媽咪擎來一紙求教，說是其女兒命盤，言談間面露憂色而不斷摇頭嘆氣……我接過咗端詳一刻笑語謂靚媽：「你女兒斗數貪狼守戌垣羅網對冲辰宮武曲亦坐羅網，俱廟旺。身宮破軍文昌化科纏火羊天壽午垣財帛、馬頭帶箭亦廟旺，對宮廉貞化忌守子垣，三方四正殺破狼……」

    邊說邊看發覺對方顯得不耐煩，鑑貌辨色知道來者在内吃盡女兒叛逆性格苦頭而在外更加受過不少「名師」老點。於是更加慢條斯理繼續吊佢胃口：「再睇八字：庚寅月、丙子日柱、壬辰時。話就話殺印相生查實傾向殺重身輕………」說話至此對方果然妙目一轉問道：「又係一大堆術語，簡單啲究竟係點？」至此我認真對靚媽說道：「令愛命格非同小可，將來肯定專業成材兼且旺夫。唯獨是未嫁一日均任情任性不受約束。若不由其獨立自主而橫加規管必有禍事發生，好似舊年戊戌，時柱天剋地冲肯定有災劫！」

    說話點中了靚媽穴道令其聽後醒了神：「大師好嘢，個衰女脾性做媽嘅邊有唔知！晨早已送咗佢去美國由得佢自生自滅……誰知舊年年頭先飛咗個男友、跟住考試過勞患上「焦慮症候群」發哂神經……結果的咗佢返香港，家陣最擔心佢唔知幾時至康復？」

    我看住命盤沉吟片刻回道：「（焦慮症候群）過咗立夏可痊癒，至於全面康復要待27歲候亥運，事關佢目前23正行值丁亥運之丁干、用神壬水咁唔好彩被合住。」我繼續說話：「由於令愛殺重身輕兼夾斗數廉貞化忌守子垣福德照身宮午宮財帛，職業宜從事見血或厭惡性質行業……」，靚媽聞語搶答：「個衰女家陣就讀於大學美術學科，好似修緊乜鬼野獸……」，我呵呵笑語說道：「哈哈哈！萬般皆是命半點不由入，你乖女所選學科合足命理要求！須知道畫畫有種派别叫「野獸派」，聽聞係20世紀率先崛起的象徵主義畫派，畫風強烈、用色夠膽，將印象派的色彩理論與梵高、高更……等後印象派的大膽塗色技法推向極致甚至極端…… 呢種正是野獸飲血風格，同等於見血行業。」