答讀者問(1901-1950)

    (由於本網站廣受歡迎,國內外讀者電郵問事與日俱增。而我答覆來件務必親自作答,絕不假手於人!同時只限於在網上列出,不設個別私下回覆。但因問事電郵實在太多,實在無法一一解答,由即日開始,將會採抽簽形式解答。情非得已,謹此向向隅者致以深切抱歉!

    此外本人答讀者信有三種情形不作答:1.分不清來信讀者性別2.搞不清出生日子是農曆抑或國曆3.沒有姓氏稱呼的來信。敬請來信讀者注意上述三項問題。)

文.吳鈞洋

1950. 本人K,女,二十歲,現為學生,想請問: 1).事業。(特別是本人可否到外地發展?到外地發展會否順利? 2).姻緣?3).本人對掌相頗有興趣,自己看自己的掌時,發現左手比右手差很多。這是否表示三十歲前的運程會較為不佳,有什麼方法可改善?

鈞洋答:你條命丁巳日柱生申月、時干透甲木,係財旺用「印劫」命,由頭好到尾。1).你條根本就係出國命,出外勝過響出生地發展多多。2).好大機會嫁出國,夫家人多勢眾、末來老爺係「員外」居多,24歲後應該真洞房。3).咪好囉!30歲前先天讀書之際,要隻左手咁大做乜,想做老人精呀?

1949.先謝謝你抽空解答:  姐姐"Momo"近期身邊突然出現了追求者,但他比她小6年, 矮過她也不靚仔。 她現在心大心細、 不知怎好。想請師傅看看她的姻緣是怎樣,給些指引這個會否是她的真命天子?嫁了他是幸福還是坎坷?還有想知她的工作、子女和將來命運如何?

 鈞洋答:阿毛妹,難得你咁關心家姐毛毛嘅姻緣!毛毛佢條命係「金水傷官喜見官」,即係婚姻好收尾,之不過唔適宜早婚,仲有係必須異地姻緣。由於佢以火看事業和老公,故大利火鄉運。唯獨49歲後方入火鄉,我認為明年2010真命天子應該出現,可以旺夫終老。其餘咩都要待50歲後方轉好。

 1948.小女姓梁,香港出生,今年25歲,是一名碩士生,如無意外今年內可順利畢業。1)想問問事業:畢業後應出去闖下、 還是適合留校從事研究工作較為合宜?2)有關姻緣:心上人於去年出國做生意,雖然一直保持聯絡、但現對他好像沒啥感覺了。真命天子何時出現?

鈞洋答:七月辛金、金過強宜用壬水洩金,喜時干透出獨壬水傷官為用神,人肯定靚女兼且叻到絕頂,加上一路金水運係絕對天之嬌女。1).30歲後行傷官驛,好難賴在出生地唔走。而斗數破軍化祿守遷移,出外必然大有發圍。2).五行獨殺守夫宮,不宜早婚卻能旺夫於中年,只不過個人自視甚高,等閑人未必啱心水。講唔定三十到mun先至嫁得出。

1947.本人姓林,女性,香港出生。現想請教師傅:1)  我的事業運如何,會否有更好前程?(因現時工作常有阻滯, 又吃力不討好, 非常沮喪…) 2)現時男友沒有工作及收入,結婚計劃無限期押後,將來有否機會結婚生仔?

鈞洋答:乙木命生酉月金旺極之際,五行金木兩神成象,我若唔強則弊家伙,幸虧時干透出甲木幫身而籐蘿繫甲,唯獨不入50歲後嘅木運、只有禁地游水見步行步。1).前程似錦呀、靚女,之不過還要挨多拾年八年添!2).若然唔出國「和番」睇怕禊灶罅居多,事關你斗數中太陽守夫宮響亥垣而你又係近黃昏出世。

1946.師傅你好,本人Karen、姓黎,女兒在香港出生。想問她的學業會否有所成,又會否嫁不出?

鈞洋答:Karen,令千金係土金傷官命,四柱土厚兼夾燥、少啲金水都唔掂,但可惜五行欠水,要到53歲過後先至水頭充足。咁搞法,睇怕要較腳去西方國家才有運行,否則樣樣都唔多睇好。

1945.你的答讀者問好有幽默感,我雖然心情極之唔靚,但都覺得幾好笑。我也有好多困惑要請師傅指點。如果有幸抽中我的信,你唔需要解釋一番什麼五行用神,你講咗我都唔明,白費你心機,就唔浪費你的時間了。我想問:1).我衰了好多年,幾時先至有運行(指事業)?2).我會不會離婚?如果離,會不會就此孤獨終老?3).我而家在北美,我下半生會在何方流浪?

鈞洋答:鬼咩!五行寒過韓湘子,38歲後先至有運行。1).今年開始轉運,明年會有新變化,有30年好運。2).仲未離咩?呢兩年小心矣!離唔成嘅話、老人家有難(剋)。3). 38歲後環境相對穩定,再唔會好似依家無腳雀仔咁。

1944.師傅你好!本人有少少疑問,如師傅能抽時間給意見,小女子一定心存感激和一解心結。小女子姓黃,到目前為止總覺人生起伏頗大,姻緣還沒有,工作又看似不太穩定(或者受到現在外圍因素影響)... 是否沒有姻緣運一生要靠自己

鈞洋答:嗱!如果要我畀意見,當然係希望你做人圓滑番多少而咪咁耿直,事關你斗數係武曲化忌天相守命夾入天梁化祿,會紫微化權,廉貞天府化科。橫睇掂睇事業財運斷唔會差,唯獨人際關係和感情往後仲有排煩。

1943. 敬佩師傅普渡眾生。本人姓林,女性,政府職員,一直做得不順,是否做錯行?想出國發展重新開始,不知有無機會?往哪個方向好?做什麼好?謝謝。

鈞洋答:五行欠水缺金,五行干旱過我個銀包,水運45歲行完,賴在政府機構唔走、除非調去「水務署」否則若然有運行我幫你挽鞋。去歐洲、美洲啦!最適宜費唇舌之工作。

1942.本人姓黎、女、生於香港,想問: 1)夫妻宮如何?能否白頭到老?2)子女宮如何?會否孝順我?3)晚年如何?60歲後生活過得好唔好? 

鈞洋答:水木兩神成象係正宗順洩傷官格,用水通關。1)要經歷過坎坷先至結得成婚,否則有機會補嚐苦酒。老公大你8年左右或相對細你1-2年以上。縱使白頭如任總,卻免不了內心痛苦(鬼叫你太陽陷宮化忌守福德咩!)。2)子女宮反而幾靚,之不過都係旺女唔旺仔。你識做咪孝順你囉!(獨立)3).天同守命晚年至有福享。

1941.偶然在網上遇到你的網站,看到你為很多人免費算命,你既回答用字真係好搞笑和精彩,實在吸引我也想找你算算。本人女命,姓梁,叫Julia,1)我同家人係咪有刑剋(父母和兄弟姐)?2)我姻緣如何?幾時嫁得出對方有錢嗎?我多數生仔定女?3)我適合那些行業?

鈞洋答:巨日照命,陽光夠哂猛、而月亮亦光華正茂。1).唔算刑剋,唯獨有缺憾:手足容易發生意外、父緣極不足。2).瘦田冇人耕耕開有人爭,一生明顯遭遇上三角關係。若然不「和番」恐怕嫁杏無期。老公唔算有錢但有魅力(引來烏蠅一大群)。命中陽光夠哂猛自然生仔居多。3).越費唇舌越涉偏鋒(包括投機)越啱。

1940.我叫Eva、女,我今年生左個BB仔,我BB出生當天是破日,據聞破日出生欠吉,我本人好擔心,想知是否有影響?我想問BB健康、學業、將來事業如何?

    鈞洋答:乜水話破日生仔欠吉呀,咁冇根據嘅嘢你都信?你個B條命唔差,係傷官生財命,用神在妻兒宮位,加上31歲到66歲都行傷官命,青年行運到老而無驚無險,晚年還享到兒孫福添!

    1939.吳師傅你好啊!之前朋友經你批命話好有幫助,所以冒昧請教師傅,希望師傅都可以幫幫我忙俾地意見!小女子cathy,廣西出世,現于澳洲讀書。小女之前似乎沒有真正的因緣,自己好擔心,所以請問師傅:1)何時有姻緣出現,大概咩時候有結婚機會?婚姻如何呢?2)以後做咩類型工作適合我?以後財運好唔好啊?3)有人話我去澳洲運氣會好點因為有不同地運,系迷澳洲比較適合我呢?

鈞洋答:成條命寒過韓湘子兼夾水汪汪,必須用火土先可以平衡全局,命中喜見丙戊火土透干,係財官格、而南半球之澳大利亞最適合你定居生活。1)由於你條命不利男性,所以47歲前愛情必然多波折,就算結咗婚都有變數。睇嚟最快都要2013年年尾。2).最適宜火土行業,金融地產首選。52歲後富甲一方終老。3).條命喜南方,南半球嘅澳洲你自己話呢?

1938.師傅好,這是我第二次來信,我名羅X珍、女、生於香港、希望好彩及盡快地得師傅指點。到現在,還俾小人害。連份工都無埋!幾十歲,好傍徨?請告知下半生命運如何?

鈞洋答:阿珍,乜咁慘畀人害到連份工都無埋呀!睇下,鬼咩!丁火生亥月地支會北方、而天干朋透壬水辛金,由於年月支係木緣故而不能從,貧弱丁火在滔滔大浪之下侷住成「大海孤燈」而任殺。老實話,你唔到51歲後咪旨意有好日子過,之後有25年火木運,雖然還要做、但係環境和際遇則比前好得多矣!

1937.我叫阿秋、女、生於香港,想問姻緣、讀書、事業運。1)我係副學士學生,有冇機會升讀大學?2)適合從事咩類型既工作?事業運又如何呢?3)何時會有真姻緣出現,對方會怎樣?4)適合早婚嗎?我鼻樑有節。

鈞洋答:條丁火命本來用金劈木生火,惟時干卻透出壬水作合,係貪合忘用之命。1).26歲之前因為行戊土傷官見官運、應該仍係讀書期。之後畀個壬水官人合住咗、唔知學業會點。2)可以從事金融、保險…..等等行業。3).26歲後有機會真洞房,唯獨31歲後小心戙床(分手)。4).41歲後婚姻可以完美終老。

1936.吳老帥您好!本人姓劉、女性、本港出生。請問:1)何時會有真姻緣?好怕會孤獨終老。2)如有,對象大概會是一個怎樣的人呢?好等我留意一下。3)夫妻宮在四馬地,會易有異地姻緣嗎?(因有機會出國)

鈞洋答:我依家威風八面成了老帥,哈哈!1).橫睇掂睇,39歲後行完「申巳亥」夫宮三刑逢沖、進而新運酉金合住月提隻顛馬(巳火)應該真洞房而不會再孤獨。2).巨日守夫宮化祿化權,應該係外族人、肯定豐滿兼且光頭,同時好叻講嘢和鬧人。3).你目前正係行緊驛馬交替運,講唔定今年下半年出國。以你驛馬沖夫宮、加上武曲守命,唔和番點嫁得出。

1935.我姓傅、男性、出生於台灣,請問師父我的事業及財運婚姻如何?覺得人生疑惑很多,想請師傅為我解答。

鈞洋答:命無正曜、天機天梁守遷移,機月同梁命,祿科權忌會照,個人肯定有思想兼且能言善辯,唯獨諸多壓力和煩惱。必須離鄉別井40歲過後才有好運行,利於費唇舌及競爭性工作(越是多說話講,越是熱鬧繁盛的地方越適合你)。除非異地姻緣,否則40歲過後婚姻才完美,妻子有才藝和氣質、但免不了挑剔(濕滯)。

1934.小女姓黎,生於香港,呢幾年的愛情運很差,1)請問何時出現真命天子呢?2)我可以結婚嗎?3)今年(2009)有拖拍嗎?4)今年的事業運如何?

鈞洋答:金水傷官,聰明善變人亦甜。弊在五行缺官星且金寒水冷,太陽天梁陷宮守命夫宮同巨會天機。1)天子年年有,唯獨真命卻難求。睇下出年嗰件係唔係真!2)由於你命剋男人,若然唔嫁出國睇怕幾難洞得成房。3)應該有,之不過係傷心流淚嗰種。4)好似麻麻喇!

1933.我叫小瑪、女、年前曾登門拜訪,承蒙大師指點、神機妙算,本人已於上年出閣,唯獨工作未如理想。記得大師曾說我工作幾好,可惜現公司制度有問題,加上同事又不甚合作, 上級又時常無理取鬧請問我今年有無轉工機會?前途如何?

鈞洋答:壯木生酉月金過旺、必須用陽光丙火調候、再用丁火以制金。30歲後至入午火運,即係話你要生完仔之後至有運行。今年己丑金強入墓,刑剋長輩之餘更不利上司,個人年內情緒也肯定唔好得去邊,所以轉得成工都唔恭喜。等出年啦!到時將一天光哂!

1932.我姓鄒、男,香港出世,1)請問大師我呢數十年既運會如何?2)性格會是如何?3)我的事業及感情會何時有起息?4)將來我的妻子特徵。

鈞洋答:武曲化權守羅網,會照紫府化科纏祿存、廉相、貪狼三方四正,1).呢幾十年嘅運唔會差,但肯定勞頓奔波、文事武職,非從事投機偏鋒或持工具利器工作不可。2).性格剛強惟有義氣、擅用人際關係。3).事業及感情28歲後才有起色,唔排除離鄉別井先至有作為。4).第時個老婆最大特徵係恰似柳玉娥再世。

1931.本人鄭X梅、女性、現居深圳現有問題如下: 1).本人於05年替男友生了一個女兒、08年再生下一個兒子,想問男友會否離婚取我為妻?2).兒女長大後有出息嗎,和父母的關係如何?3).本人晚年如何?事關有人說我少年剋父中年剋夫、老年剋子。

鈞洋答:戊戌魁罡守命生戊辰月未時,確實父母、夫、子宮位三刑逢沖。1).由於你五行土多朝木,而以木看夫。如是者,命中註定一生不能坐正做「正宮」2).將來子女必成材而母憑兒女貴。唯獨因太陽化忌故,女兒緣厚而兒子緣薄。3).不能說「剋」,是由於你命中太陽化忌不利男性之故,命中註定男性親人緣份極薄和意外多多。

1930.本人張X晶、女、出生大陸青島,我在網上看到你的郵箱。看到你為許多人解答人生困惑。我一直運勢很不好,很迷茫!如果能在你百忙時間堙A為我看一下。那就太感謝你了!!

鈞洋答:命屬寒木、冬生宜向陽,所以你名字有三日係長輩有見識。五行水過多而火弱,36歲過後才入火鄉30年,換言之中年方有好運行、行至晚年,你適宜從事火土行業、猶其大利理財工作。

1929.本人Elly,女命,想問下到幾時事業運會好,及問財運?會有子女嗎? 

鈞洋答:條命戊土生戌月而雙甲透天干、五行用金劈木生水,係身「殺兩停用食制」格,40歲事業、財運並旺,亦利生育,之不過斗數太陽化忌而不利男丁,求仔恐怕難啲矣! 

1928.我爸今年中證實患腸癌,後至末期,因癌轉移至肝。雖然他經手術後精神很好但我不樂觀。以下是我爸的出生年月日時,請問他的五行喜忌和趨避?哪些年份需要較小心,風水有幫助嗎?朋友聽她的師父話,買了塊白玉給她的爸,我爸也可以帶白玉嗎?周X玲

鈞洋答:如果依你附來你爸之出生年月日時,係金白水清身強格,要過咗80歲嘅丑運才拜拜。但如你所陳述之病情、已入膏肓,不能不相信科學矣!反而你以往日驚夜驚之「己酉」日柱犯伏,家陣方驗事。嗱!你五行只有年支申金一點壬水長生。明年庚寅天剋地沖,因住農曆七月甲申朋沖而出事。

1927本人姓曾,女姓,香港出生。想知自己真姻緣何時出現?將來丈夫有何特徵?沒有找到工作已有1年多.....何時能有呢,咩行業適合我?

鈞洋答:乙酉日柱庚辰時,由於命中透雙乙所於不能入化合格,而用癸水洩金生木。五行啲金旺過「金正日」、容乜易畀佢哋劈個粉身碎骨!但無奈命以金睇男人(坐住酉金刃、更加看丈夫),如是者自自然然見親男人就不自覺地閃。2010年後真姻緣至有機會出現,對方應該大隻面圓、離過婚或死咗老婆嘅man。今年工作運唔穩定,反而明年好好多。為人解決麻煩,包括財務之工作幾啱。

1926.本人姓e吳、女性、71年香港出生,想問工作及母親健康。

鈞洋答:壬水生丑月,五行欠火而木弱,若然唔入火運、睇怕冇樣嘢會令你稱心如意。今年月柱犯伏吟,加上目前酉金印星羊刃運,工作不過上頭大變動、自己不過辛苦而矣!但母系人口卻不敢恭喜、恐怕會有老人家犯手術意外、甚至哂唷啦啦!

1925.我叫婷婷、女,我與家人關係極度疏離,尤與父親很久無見。1).我未來工作運如何,會更上一層樓嗎?2).會富有嗎?這兩年收入進賬不少。3).姻緣運如何,我追求者眾但沒有一個我十分愛的,會嫁貴夫嗎?

鈞洋答:五行屬弱金、生夏令而火會南方,要搏哂老命好似消防員用水救火,五行喜用金水而忌木火。1).未來31歲入財「木」運,多數畀人陞上神檯,事業肯定更上一層樓。2).你條係「因財引鬼」命,分分鐘會招如某名風水師嗰類男人而惹禍上身。即係話大富多數冇你份,萬一意外而富有、收場將一如甜甜姐。3).本地姻緣多數喊得一句句,非鬼佬勿嫁。唉!衰在佢貴你唔貴呢。

1924.我叫阿慶,想請你為小弟批下八字:1).我今後的事業運如何,從事何種工作較有利?2).姻緣運如何?3).有算命師父話個我的用神系財星,喜用火土。請問吳師父這樣?合適沒?

鈞洋答:甲木生戌月,五行土過燥、惟喜用金水、金水卻過弱,若非離鄉別井遠走西北、肯定難有奇逢佳遇。1).現在行水運,48歲前應該不差。只適宜從事技術工作,持工具利器謀生最佳,其次係西方人機構從事投機。2).財多身弱,結識之異俱強悍有為。老婆更惡過鬼。3).哪位算命師父一定怕你算完命不付款,才這樣恭維你。

1923.本人智美、女性今年剛剛同時間失業失戀,本人年紀不少了, 可以和何時找到相愛的人結婚生仔呢?工作要何時才找到呢?急…請賜教,有什麼催旺自己的姻緣呢?

鈞洋答:火土傷官命,顧名思義傷咗個官人喎!唔入財鄉生旺官星勢難有好日子過,幾時有運呀?39歲庚申運啦!有得生嘅,仲唔排除奉子成婚添!今年時柱犯伏吟(己丑)若然好運嘅話,我哋肯定要燒書轉行!

1922.我姓譚、女、廣州出生,請問我的姻緣如何呢?真姻緣幾時才會出現呢?是個怎樣的人呢? 

鈞洋答:己土生亥月,年時雙透丙火調候作用神。29歲前夫宮刑沖肯定難有姻緣,縱使勉強結合也終必離異收場。2012應該可以于歸。未來個相公外形將肥嘟嘟,年齡或長你7-8年又或幼你2-3年,有品略嫌腌臢聲氣多。

1921.本人冒昧想請教吳師傅,望吳師傅有緣為我解答。在此先行謝謝吳師傅。本人姓陳、女性、,香港出生。1).究竟我的真姻緣幾時出現?2)有子女嗎?3).每有男朋友一定情變,或有第三者?4).是否條命衰?

鈞洋答:甲木生亥月,五行以金水為忌神,唔好彩、命卻以水金分別看阿媽和男友,換言之,同阿媽鴻溝一定深,由於鴻溝介蒂緣故,遇上有人溝自己也一樣逃避。1).33歲申金運。2).有兩個利仔不利女。3).鬼叫你姻緣末到之運,遇上嘅都係衰人居多。4).人衰與否唔知(嘻嘻……講笑咋!),但條命一啲都唔衰係可以肯定。

1920.本人姓曾、男性、香港出世,本人一生事業如何,會和太太白頭都老嗎?我和太太幾時會有bb呢? 

鈞洋答:丙辰日柱生五月而全盤係火、四柱缺金,獨見一點癸水透時干。五行用水調候、喜金生水,亦即係金妻水子。查你個命局火多無金,48歲前好難擔保夫妻恩愛恆久不變。斗數天機天梁纏天壽田宅照子女宮,註定有一子,睇下今年下半年老婆有冇機會中精捉蟲而懷孕,之不過咁嘅子女宮小心第日有可能包多個女響外頭。

1919.本人李X銘,男,廣州人。想請教吳師傅我的用神是什麽,忌神又為何?再麻煩師傅提點提點,本人想做點小生意,我適合做什麽行業。

鈞洋答:己土生子月,本來天寒地凍用木火。唯獨四柱火土旺過鬼,反而喜用金水而忌火土。最適宜金水行業,即係五金及水族……等等生意。

1918.本人姓沈,女,生於廣州,想問09年以後的運勢、無男友,請問婚姻會如何?現收入也不滿意,我是否會離開本地生活?如果離開,何時好?哪個方位旺?

鈞洋答:未來拾年你天相守命坐祿夾入兄弟宮太陽巨門化祿、權,父母宮天機天梁纏天壽,對冲廉貞破軍化祿,天府守財帛。有個明顯現象係如你所願離開出生地,當然大利西北啦!嗱!仲有個象係父母宮有年齡不相稱之人口出現,一係應驗老爹臨老入花叢,一係驗證某位有銀両之員外伯伯喜歡你。

1917.本人小姓陳,女性,香港出生,想向師傅請教:(1)本人已有多年沒有拍拖,想請問一下本人的真姻緣何時出現?如有真姻緣,真命天子會是一個怎樣的人?(2)目前財務出現困難,何時可以解決?(3)想與朋友合作做生意,想請問做那類型生意會較有利呢?

鈞洋答:阿小陳,乜你多年冇拍拖咁慘呀?唉,鬼叫你乙巳日柱月時透丙丁咩!呢啲格局係叫食傷混雜,我師傅教落話,呢種格嘅女性若然不出塞和番,嫁得出個老公都牙煙。1).35歲後可以于歸或苟合。由於桃花守夫宮、肯定風流之極。2).今年下半年可以解決財務問題。3).大利金水行業,即係同金同水有密切關係行業。

1916.我叫阿丁、男性、閩南人士、惠州出生,從2005到現在沒有一份工做得長,是否命格不合工作嗎?我是做燒味。

鈞洋答:丁巳日生子月,除了日柱之外其餘六字俱金水,是財多身弱命,一生辛勞意料中事,縱使52歲後入火鄉而身旺任財,仍然辛苦在所難免。明年2010年進入好運,燒味或廚藝絕對適合你。

1915.我叫阿騫,男,我結婚3年,還沒有孩子,想請您看看什么時候能有孩子?

鈞洋答:阿騫,你會否唱中國名歌「三年」呢?你的情形就是這樣:左三年右三年,看來2013做爹哋!事關你條命丁酉火地支全「巳酉丑 」,獨時支丑藏單癸水、屬於獨殺為權格局,將來肯定得貴子,唯獨必須午火運「巳火」會入時柱才能「成功做人」。

1914.吳師傅,知道您一定很忙,如有時間,請幫忙看看一個小女孩的八字,耽擱您的寶貴時間,感到非常抱歉!河北任丘。

鈞洋答:小女孩丁巳日柱生午月,用水調候喜水生金,五行天干透金水,地支金會局,算得上喜用得地。奈何火旺月提,恐怕童年不利父母長輩(猶其母系),個人也有隱疾纏身。最佳者離鄉別井,適宜西北地域生活,49歲後到老福祿壽全。

1913.我是江蘇的HELEN,經常流覽你的網站,很是佩服你的批命的本事,所以也想讓您幫我看看我的姻緣和財運什麼時候來到,以後婚姻會好嗎?

鈞洋答:乙丑日柱生春令,地支會東方,天干透庚辛,屬於官殺混雜命,但喜用神卻在夫宮(獨癸水)。斗數命宮巨門守亥垣而太陽居巳宮遷移,夫宮在酉坐太陰纏天壽……。如此一來,大象顯示出一生必陷三角關係之煩惱,正常婚姻多有第三者介入,否則自己屬第三者。但無論如何丈夫一定係有為之人,只不過年齡大多有差距,或長7年以上或幼2年以上,同時會嫁往外地。26歲後可以于歸。

1912.我姓梁、女、想問工作運,做那一種工作較好?另姻緣運如何,何時覓得真命天子?他會是個怎樣的人?

鈞洋答:戊子日柱生戊戌月,全盤啲土厚過崇山峻嶺、兼且燥涸之極,呢個時候少啲金水都唔得,也好彩日時水源充足、年時會金局生水。條命視水為財,既然夫子宮位係喜用神,呢世婚姻、子女、財運……等等斷唔差得去邊。你適宜從事金融行業,一世打鬼公至有際遇。真命天子怕者今年會出現卦。

1911.本人叫Ronda、女性, 廣東出生、現住澳州, 我得了子宮瘤,醫生說更年期後可能會縮小,請問我以後的健康如何?另想問:本人還有運行嗎?晚年如何?好怕老公先死剩下我孤單一個。我命中是否沒有兒女?

鈞洋答:機梁梁化祿羅網守命,會照機月同梁,女命機月同梁十居其九有婦瘤致病基因,加上你條命火土俱旺而缺水更明確,唯獨「機月同梁」也是長壽結構,你以後的健康毋庸杞人憂天。武曲化忌守子女宮自然不利生育,再加上命五行以火為忌、亦以火看子女,看來生育必艱難縱有也無緣。

1910.本人吳☆穎、女,想問姻緣和事業~唔該!!

鈞洋答:廉貪守亥泛水桃花,但天府守夫宮纏祿存、丈夫穩重之人。五行戊午生酉月、辛金傷官旺過乜,惟日坐午火羊刃為用神、會時支戌為用。第時個老公外形略豐滿且作風穩建,目前雖然行緊桃花運、唯獨姻緣要過31歲後。事業利專業或金融,明年好過今年。

1909.本人Cici、女性,出生廣西後移居廣州。請問本人此生事業運/財運/家庭婚姻/健康狀況及09年簡況?

鈞洋答:五行全盤俱火獨時支酉金,斗數太陽太陰化忌守丑宮,一生男性親人緣薄而女性人口多刑剋。1).利於專業操作、推廣、金融….等等,一生財來財去、只許小康不能富有。2).除非嫁出國、和番老外,否則此生必陷三角關係到老。3).五行缺水,疾在腺體,猶其婦科生育部分。今年感情離合,易犯生育血光,也不利父系人口。下半年較佳。

1908.本人姓梁、女性、想問自己的喜神和忌神,是否忌土? 2009 年是己丑年流年傷官會有什麼變故嗎?事業會否順利?我子女宮只有祿存是什麼意思? 

鈞洋答:丙寅日柱生戌月、己丑時。用壯木疏土生金、喜水生木。你五行係忌土,唯獨丑時支卻不忌。不特止不忌、所有喜用都藏在其中:全局獨一癸水藏於其間(獨官得貴獨殺為權),辛金亦藏其間賴土生繼而生水。今年己丑年,在你來說點止流年傷官咁簡單,還有時柱犯伏吟添!今年子姪生育血光,自己如果有料到宜審慎安胎,仲有係夫家人口有刑傷,個人可能轉工調職。你命中肯定有子女,至少兩個。子女宮無正矅只有祿存,可借對宮太陰化祿天同用,祿主財,既然雙祿咪第時會生富貴仔囉!

1907.本人姓黎,女性,自結婚以後頻生爭執,差點弄至離婚,現在感情漸漸穩定、打算於生小孩,本人想請問大師如本人於2009或2010年生小孩,會否跟我或我丈夫相沖,或對小孩不利?(因為我曾經懷孕,但小孩因健康問題流產了),同時,我跟丈夫的感情發展如何?

鈞洋答:庚金生申月,四柱金多恰似舞住柄大關刀上戰場,五行用水洩金生木,復用木生火,再用火煉鋼(金)。由於你個性率直坦白一如吼東獅,夫妻恩愛卻似貼錯門神在所難免。明年庚寅多數生小孩,雖然是冲你生肖,但我認為影響不大,你將來或許有兩個小孩,肯定聰明好學有大作為。

1906.我是西貢阿Po,女性,大學畢業後剛好工作了一年多, 從事酒店的人資部。我適合這個行業嗎?如不適合,什麼行業才合適?另外23年來從沒談過戀愛,何時才有真姻緣?

鈞洋答:西貢Po姐,你條命弱金生金旺申月,略嫌五行木旺以致砍崩刀,一生人肯定為財辛苦為財忙,並且要集眾人之力去求財,既然「人力資源」有人力兩個字、斷估合適啩!但到底認為金融於你較適合。乜你由做靚妹嗰陣已經「師姑」到依家嗱?聽落都戥你難過。冇法啦!鬼叫條命註定32歲後至有姻緣,等下係啦!

1905.我叫FunFun,未婚女子,至今一事無成,身邊同齡朋友都有美滿婚姻,穩定工作,但我卻失業幾年,06年揾到工、但生意又不穩,常怕結業而又失業!1).請問我牛年開始以後的工作運如何?會失業嗎?或不停轉工而不安穩?2).財運如何?到老有積蓄嗎?3).姻緣如何?沒婚姻嗎?

鈞洋答:分分有得分,唔使閉翳嘅、肯定有甜頭益你!你條命天機丑垣陷宮守命,太陽太陰分別亥卯、夫宮福德失位,身宮在遷移未垣。一生人註定哂心機挨眼瞓,若然不出外呢世冇運行。1).今年多數郁動,2010年轉好運、很大機會出外發展。今年唔敢擔保。2).41歲後有廿年好運行,財源滾滾。3).41歲後寫包單嫁得出。

1904.我姓:陳、姓別:男,我現在於美國讀了一年書聽聞下年我本命年犯太歲,好大件事師父你可以幫我看看下年運程嗎?

鈞洋答:今年對牛彈琴,係就係犯太歲、唯獨碎料而矣!若然結咗婚仲話驚老婆有事,未婚不過三角關係煩啲嗻!有揸車也驗駕車多碰撞而矣。事關流年錢銀女人並不差,只嫌心散多少罷了。斗數流年命無正曜丑垣對沖遷移借武貪纏昌曲祿科權,會照殺破狼三方四正,好壞均驗於外地,係有積極變化和利好結果。

1903.我姓徐、女、香港出生,請問:1)事業運如何?2)何時會有真姻缘?3)對方與我相差之歲數?可以白頭到老嗎?4) 財運如何?幾時行大運?

鈞洋答:光禿禿一點弱金生六月,四柱火炎土燥而土厚埋鐵,五行欠金扶助缺水調候。雖然一路行金水運,惟命運到底打折扣。1).最適持工具利器或操作行業,否則宜財經而供職西方機構,39歲後方有際遇。2).易纏三角關係,如果不驗出塞和番(嫁鬼),睇怕幾難嫁得出。3).如果中國人梗要大過你十年八年啦!鬼佬另計。4).目前正步入衰運,39歲後入大運、直到69歲都鳥語花香。

1902.你好。希望這次能夠抽中。姓馬,女性,出生地上海。想問婚姻與工作:1).何時結婚?能否看出對方的年齡,職業,何方人士,家境?是否離異?我今年遇有一1963年出生男士,及一1969527日出生男士,有否其中一位是真命天子?2).今後10年我會在何地發展?美國?亞洲?會不會回上海?

鈞洋答:儂的命「子午卯酉」全地支,一生桃花藝術命,審美眼光強烈、看事物頗有質感。1).一生易蹈三角關係,陷阱必須異地姻緣異族通婚,夫宜長自己8歲以上專業人士,家中「東的」不少。29歲後姻緣到,但還要糾纏過三角關係才可以成功。2).應該是美國,若然回上海、恐怕嫁不去。

1901.姓譚、男性、生於澳門。我想請問:1).我的人生如何(多災多難還是平平無奇?2).我適合從事哪種行業?3).我於0881日於國內發生嚴重車禍、多處骨折但現在已恢復七八成,我會轉好運還是繼續倒楣?

鈞洋答:2025歲中運坐丑向未、命無正曜借遷移宮武貪為用,雙忌夾遷移、出親門多數領嘢!1).癸水生夏令巳月,五行金水多成「劫印化晉格」取月提為用神而財通門戶,入富格。2).適合從事理財行業,從商則宜飲食。3).上面提及25歲前雙忌夾遷移、出親門多數領嘢!猶08年「子卯酉三刑逢沖,復巳亥沖」若然冇事嘅話?哈哈!「確係天冇眼」。35歲後至有運行,冇法,唯有挨住先!

諮詢及留言