答讀者問(1951-2000)

    (由於本網站廣受歡迎,國內外讀者電郵問事與日俱增。而我答覆來件務必親自作答,絕不假手於人!同時只限於在網上列出,不設個別私下回覆。但因問事電郵實在太多,實在無法一一解答,由即日開始,將會採抽簽形式解答。情非得已,謹此向向隅者致以深切抱歉!

    此外本人答讀者信有三種情形不作答:1.分不清來信讀者性別2.搞不清出生日子是農曆抑或國曆3.沒有姓氏稱呼的來信。敬請來信讀者注意上述三項問題。)

文.吳鈞洋

2022.本人芳芳、女、台北出生,請問老師,本人是否將來可自行創業,房地產適合嗎?感情始終沒有遇見合適的交往對象,正緣何時出現?

鈞洋答:癸巳日柱生酉月,五行金水俱旺,坐下夫宮巳火作用神       (用火土)。本來財官為用神必大利從商,唯獨斗數太陽化祿守亥垣而天梁守未宮財帛,從事房地產經紀還可以、做老板娘則不敢恭維,事關天梁守財帛一生為財帛周張費神。唉!生意人財政捉襟見肘,你心甘情願嗎?目前有姻緣到,或許嫁得金龜婿,唯獨一生註定纏三角關係告終。

 2021.我姓棻,本人今天轉新行業「地產代理」未來日子可否從此行業發展得以成功,及會否成功自行開業?及日後可否另從事風水命理行業?

鈞洋答:嗱!事關你冇註明自己係「太抑或大」我唯有當你係太命睇、所起嘅亦係男命盤。E下先,條命丙午日柱而全局係哂火、淨得時住庚寅而五行缺水、干過我荷包。冇法,唯有視作「假從旺格」一世喜行木火運。宜家行緊辛巳火鄉,即係話都有際遇嘅。斗數目前坐太陰化忌對太陽化祿,不利女人明顯、或刑剋、或得罪甚至被負累,個人泌尿腎經、骨、牙…..等等也多暗病纏綿,2010年最驗證。天機化祿守事業身宮,照道理也可以從事風水命理行業嘅,之不過太陰化忌喎,點知會否走「茅山改大小運」嗰泛呀?!

2020.我叫幸褔,曾經自認為自己是世上最幸福的女人。不求大富大貴只求細水長流的感情相扶持,我現在的男友是個不可多得的大好人,今生有幸嫁給他也是我的福氣。可是另一個他出現了,他很優秀,我接受了他、很愛很愛他,現在我為難了,我該怎麼辦?只有求問師傅給我做主了。

鈞洋答:咪咁大聲呀!叫我做主、分分鐘會被斬開九碌。有時咪話星座唔準,好似你7月22日出世嘅人,同一日交接、又巨蟹又獅子,仲慘過八字食傷混雜。條命係殺破狼會祿科權,廉貞化祿七殺守未垣。唉!卻衰在太陽化忌守子宮交友。即係話,你識親嘅男人都懵盛盛、任由你擺佈,只要一日未係老公都有機會畀你飛起,今日A君嘅遭遇、明天B君肯定身受。並非話做咗你老公就幸福,仲慘!末婚頂龍被飛起,婚後講唔定被剋叉死,事關天相守夫宮,太陽化忌卻夾天府,逢相看府…..唔較腳有鬼矣! 

2019.我叫gloria,女,香港出生。想問師父我條命適合從事咩行業?一生既事業運同財運如何呢?將來有冇機會自己做老闆呢?  

鈞洋答:哈!你出世年月日幾易記噃。條命丁火生酉月,因五行啲金太旺而喜用木火去熔鬼佢,地支會齊東方(不敗)喇!誰知你卻衰多情合住咗時干壬水而不做正經事。一生嘅事業財運絕對唔會差,只不過略打折扣啫。大利金融行業。做老闆呢世都唔好諗喇!唯獨是第日嫁個有米老公而可以做老闆娘嘅。

2018.我係前日找您批命的ERIC。前天聽您解說後,有以下問題,希望師傅可以再解答:1).我42歲左右時,妻子身體有大問題嗎?她能否避過此劫?她長壽嗎?2).現在這十年有大變化,但是順利嗎?3).命盤上,哪里顯示我49歲至89歲“名成”和“利就”? 4).我適合做執法工作嗎?

鈞洋答:ERIC,你嘅問題解答如下:1).42 -49歲,八字行值乙卯嘅卯運,唔好彩「子卯酉」三刑逢沖入妻宮。至於斗數,咁啱大運妻宮亦武曲獨守戌垣雙化忌入父母宮,好明顯佢外家人口有刑剋、講唔埋佢自己亦有機會挨一刀。你太太佢目前至43歲係行緊武曲七殺卯酉,殺陷震兌而會照殺破狼三方四正纏祿科權忌加天壽,太陽福德沖照太陰化忌疾厄辰戌羅網,佢因纏天壽未必有事、唯獨母系人口及手足中嘅女性就唔恭喜矣!太陰化科守原命妻宮梗長命架。2).你條命係萬物生長靠太陽,有個太陽丙火響時柱射住,由依家起先行木地後進火鄉,到89歲都算有運行,有個毛澤東(紅太陽)係咁射住你,想衰幾難!若嫌“名成”和“利就”得耐而冇癮,可以提早退休將啲「正嘢」留畀仔女都得架!3).執法工作如保安司李少光個位都有得諗嘅,至於陀槍揹鐵嗰泛,斷估唔使諗矣!

2017.我姓:謝、姓別:女,出生地:香港,想問:1)事業如何?會否到外地展?能否出名?現在的生活很艱苦不定,應該向前沖,還是打份普通工?2)好像沒有真姻緣,每次對方都有另一個,現都不敢怕拖了!會否結婚?會有真姻緣嗎?3)有否財運?晚年怎樣?

鈞洋答:嘩!條命五行:乙酉日柱生酉月,庚辰時,天干朋透三木。成個「一樹梨花壓海棠」格,唔怪得你牙痛咁聲啦!1).事業唔錯呀!至少一世鮮會失業,出外發展辛苦得嚟或者會出名嘅,本地就只有老闆出名你出命而矣!2).話明「一樹梨花壓海棠」,唔好彩、一世都係阿二命囉。等42歲庚寅運啦,到時天干庚金幫你掃叉哂班牛鬼蛇神,地支寅木強身健體,姻緣想避都幾難!3).多病啲嗻,晚年唔差架!

2016.本人姓黃,女性,想請師傅為本人批八字:我的運程一直都不太好,何時會好轉?尤其是財運? 謝謝!

鈞洋答:42歲後啦,之前都畀你「敗哂」啲好運!事關你條命係金水傷官用印劫,必須入土金運至有得鬆毛鬆翼(用土制水、用金幫身),就係嫌條命「財多身弱傷官重」52歲後入金鄉、有人幫你搬緊啲銀走先至有運行,由來賤格之最就係「財多身弱」命。

2015.本人姓劉、女性、本港出生,我為'殺破狼'命,28歲後至今,就算有人喜歡,一是無疾而終、二是對方多數有女友,好驚是二奶命,又驚孤獨終老。請問:(1)是老姑婆命嗎? (2) 如不是, 何時會有真姻緣?  對象大概會是一個怎樣的人呢?好等我留意一下 (3) 會有異地姻緣嗎?

 鈞洋答:話就話係殺破狼命,唯獨火貪守命宮,祿存纏財帛,一世衣食無憂、你以為人人有咁命咩?!1)2).39歲前算得係姑姑命(未可能嫁得出嘛!),之後由於樓價暴升、想做姑婆也冇屋畀你獨身過世,於是守係咁意搵隻半人半鬼嫁,對方係肥佬、如果唔係跛跛哋應該忱長風濕痛,有啲米嘅。3).肯定異地姻緣啦!

2014.小女子姓何,請問師父:1).我的真命天子會於何時出現?2).對方與我相差之歲數及特徵如何?3).請問我何時會結婚ne?

鈞洋答:火炎土燥用金水,金水會聚夫妻宮,第時婚姻唔會差,唯獨……1).43歲後至行水運,嗰陣至旺夫,唔敢話你到時才嫁得出,但之前愛情都幾多波折。2).應該相差冇乜幾多,但80%要嫁去外地。特徵?豐滿之人、也幾有深度嘅,略嫌陰柔咗啲,仲有係有多少濕滯挑剔兼情緒化。3).第一項咪答咗你囉!

2013. 雅安、男,請問運程?

鈞洋答:壬水丑月生、自然陰寒用火而喜土。33歲後進入巳午未南方30年,斷估63歲前唔會衰。目前運勢財不弱唯獨刑剋母系人口,錢銀女人多卻人事紛爭多兼且不利婚姻。個人容易神經衰弱。 

2012.我是臺灣的女子小雷,從丙戌年開始人生一團糟,看過兩年的精神科..今年才開始正常,但身體從小就差一直看醫生調養。目前失業,感情至今空白,很多看盤的都覺得官殺不現財星被剋要我自求多福……這次想問老師(1)我的工作及財運何時能穩定?(2)何時……我能有婚姻嗎,或有段穩定的感情……及有無親生子女?

 鈞洋答:甲子日柱生戌月、己巳時,不菅你屬木抑或化土,都用水喜金(五行大自然生存條件)。五行火炎土燥,有江河水卻缺金生水、恰似一潭死水,金運則早在28歲前已走完。1).由於一路28歲後一路走南方忌神運,假若不從事持工具利器或航運、水產…等等行業,恐怕難能穩定。2).除非嫁西方人,否則難有婚姻。

    2011.姓名: 墨斗仔,性別: 男,問題:1)    近日有官非 (自己比人打反被告打人),能否安然度過?最低消費守行為2)    今年2009好黑,係10年來最差。去黃大仙求自身都得89 下下簽,黑氣幾時可以過?3)    分司大陸分店開但日日食蛋幾時可以好轉?4)    我離開 hk全留大陸生活命運會有好改變嗎?

鈞洋答:墨哥!哈哈,同嘜哥發音差不多。鬼咩!戊土生卯月,地支子卯酉三刑逢沖,喜用火土而忌水。加上1).2010年多數大步檻過冇事。2). 09年亥子丑會咗個北方水忌神響坐下,好驚你黐多件….帶來衰運阿嫂和你下低冇事已還得神落!3).2010年可能摺埋而搞多泛新嘢。4).忌水而留響大陸咪衰多兩錢重囉!

2010.小妹名叫恵敏、本人自幼希望能成為甜品店之老闆、非常想知何時可以夢想成真!因開業要動用大筆資金、尤其本人是有小孩之主婦、加上現今之時勢、更要120%慎重計画。還有想問本人命堿O否有提示与神佛有縁?我是否可営運一間与神佛有関之生意?而所得益之部分是作善事用途的。

鈞洋答:機陰守申垣會機月同梁,擺到明係信女命,睇怕第日要改名做惠清矣!機月同梁命唔啱做買賣生意,反而服務「阿彌陀佛」可以名利雙收(話之你將收益完全捐哂出去)。至於你條亦係白手興家命,晚年先至有福享。

2009.小弘、男、生於台灣省高雄市,為低階公務員多年,考公務員高考皆以些微分數落榜,.是否一輩子不得志?不動產運及子女緣分是否很不好?

鈞洋答:庚申日柱生申月,五行金強火虛,可以作從旺革論命,46歲癸卯運天干剋去年丁火,地支暗合申金,必有陞遷機緣,斗數運限入紫貪而紫微化權必有一番好光景。福德貪狼纏祿對沖紫微守財帛身宮,肯定長袖善舞。唯獨將來不動產多有煩惱事,子女也不近身。

2008.伍乂堅、男性,巳婚,請問夲人的事業運如何?   何時行大運?有咩要注意?

鈞洋答:驚蟄雨露、木多索水,用金劈木生水、少啲都唔掂。48歲前一路火運,如果話好掂不過車大炮。49歲後入咗金運真係有運行喇!最緊要離開出生地先至有發圍。

2007.本人姓莊、女、好耐冇拖拍啦、好驚呀! 1:現同一男子幾好傾,想知夾唔夾有冇機會?2:我同細過我既男仔發展得唔得?3:我要等到幾時先會拍拖及結婚、及我係咪尅(老公)命、及有冇兒女命?

鈞洋答:做人最慘冇拖拍,係唔係?1).你條係蓬萊仙島命,大山矗立海中央(戊土生亥月),又寒又削加上光禿禿、必須陽光溫暖,少啲火都唔掂。你個小朋友命屬丁火生亥月地支會北方,相比起你要求陽火更加甚……即係話條友屬劣質馬、可以不理。2).當然冇問題啦!3).我認為2011有真命天子出現,是否當年洞房係末知數。(真洞房呀!)唔啱至多分開,依家甚少有話剋夫!你至少有兩個仔女。

2006.我是呂小姐,台北人,未婚;去年我想轉業,聽說我當時的流年為破軍化祿,有機會轉業。不過,從去年到現在7月,一直幫忙處理家裡的變動,工作上沒有任何進展,反陷於停滯。我想請教老師今年是否有可能在工作上有所進展或是機會?

鈞洋答:不知我答你問題的時候有甚麽變動?以我估計2009年還是頗難有大改變、頂多旅行頻密而矣,反觀今年立春過後觸動寅申巳亥驛馬星而有動象。由於流年命宮紫府化科會照廉相廉貞化忌,武曲化權,對沖殺破狼遷移,不排除出外發展而有個好機會。

2005.小女姓陳,香港出生,於2008年大學畢業,本來有教授有意收我為徒,惜事有變卦。今年小女有重大決心,希望能改變現況,另拜其他教授門下,未知2010年我命中有否此機?餘姻緣不問也罷。

 鈞洋答:2008年你坐破軍而會殺破狼,流年父母宮天機化忌會天同雙忌,由於教授係父母、烏忌白忌點會順頭順路?2009年轉咗紫府中運而天府雙化科、武曲雙化權,斷估利學業不過衰感情,2010年歲運重疊紫府,我極之睇好。唔係感情呀!

2004.我姓何、女性、香港出生,想問一下我的姻緣和事業望你能指點一下, 因近來有些事情發生了, 是和姻緣/事業有關的

鈞洋答:唔使問阿貴、肯定生癪仔!事關己丑,天干剋癸水喜用,地支三刑逢沖夫宮繼而動土,斷估甩拖之餘工作亦有變。2010年事業工作、甚至愛情均有好轉機。唯獨流年刑剋女人要小心(包括多咗嗰塊肉在內)。

2003.我叫冬姑頭,女,我剛又比公司炒咗啦, 差不多份份工都係比人炒,好灰心。我只得亞媽一個,乜親人都冇,我點過埋下半生,我仲有冇路行亞?

鈞洋答:第日唔好叫冬姑頭喇,習慣性畀人燉冬菇、都咪話唔心翳!庚金鋼材生午月,金不弱唯獨啲火燒通天,用水救火為急卻嫌五行欠水,乃成火金兩神成象格。即係話乜都要頂硬上而食自己,最慘係48歲前嗰五年戌土運,三刑逢沖有價值嘅嘢莫不沖個清光、因住阿媽健康添!好運會聚響48歲後而到老,梗係有路行喇。

2002.本人姓張、女、生於香港,想問事業,財運和姻緣。之前一路都覺得不順、好多障礙,去看掌人家說我三十歲後更差,因為我的右掌比左掌差很多。請問是否一直會很窮和不能嫁出?

鈞洋答:你梗係孤乜寒畀唔足銀両嗻,否則個相士點會詛咒你呀?!丁火日元生冬令,五行金寒水冷、丁火有如大海孤燈。好運要待45歲丙火運干轉入,真正好運必須過55歲才行到。你係七殺獨守辰垣羅網,早運確係差緊啲、婚姻更加要過35歲後方有着落。

2001.吳師父:你好、本人有些問題希望師父你解答小女子的疑問我有一個朋友話我的兒子往後十餘年都會很執着,做事會不聽人講做媽媽是非常擔心的o請師父你能解答我的兒子個人的喜忌,他的名:「寶寶」他生於l997年出世、是西曆是開刀的,我只生一個、希望師父能解答我的問題。謝謝、祝身体健康!鳳萍

鈞洋答:明知劏肚生,點解唔擇個吉日良時呢?真ngongui(唔識解個英文由得佢)。佢五行水失令更盡洩於木、更不見明金生水,恰似一潭死水。幸而年支丑土內藏金水流通,復一路行金水運……咁咪好囉!回歸命,先天有祖宗風水蔭庇,後天有祖國大水射住,武曲守羅網,講到明係打仔格又點會唔執着硬朗呢?將來若然唔從事專業技術必然撈偏鋒(投機),同阿媽緣厚但剋老豆。

2000.本人姓李,男性,北京讀者,拜讀《新玄機》網站有將近10年了,您的文章是我一直很關注的重點內容。本人年輕時心急氣盛,得罪了很多領導,因此不得不一再跳槽換工作單位,從那時到現在,已經六年了。誠懇向您求測,請問我何時能找到新的工作?謝謝您!

鈞洋答:廣州市無官不貪,做領導的如果你沒有錢孝敬他肯定永不受提拔!相信北京不會吧?你的命係戊癸相合卻不化,要待木火運才化得成。換言之,44歲後才能達成你的夢想。不過2009年你應該有轉新工作之機會。

1999.本人姓馬、女性、香港人,煩請大師指教何時方可遇上真命天子,真姻緣何時降臨?我的老公會從事那行業?另事業運如何?

鈞洋答:天同守命會照機月同梁,纏六煞,更唔好彩天梁守夫宮、會太陽化忌福德。呢世若非曾經滄海恐怕幾難有洞房機會(煮飯仔嗰種唔算數),仲要對方大過你十年八載抑或細過你多少先至算數,還有係一過門男家即刻有人去見耶和華……冇法,天梁守夫宮係咁喇!由於個缺口係太陽陷宮化忌,目前庚干太陽化祿既可以于歸仲可以生女添!37歲開始擺脫衰運,2010年轉運。

1998.我姓袁,男性,大陸出生,我今年6月份研究生畢業,很想繼續深造卻沒有著落。不知我能否繼續深造?今年能否出國留學?所以現在很迷茫。懇請吳老師指點!我將不勝感激!

 鈞洋答:弱金生辰月而五行土厚埋金,必須到西方地域才有 深造和大展拳腳機會,虛齡28歲轉入好運、至少2010年才有離鄉別井可能。今年走不成的原因是時柱己丑印星犯伏吟,斗數天府守命刑忌夾天相而昌曲化忌。

1997.本人李Betty、女性,香港出生。感情一直不太順利,1)想問師傅本人何時會有真姻緣? 2)有無婚姻及婚姻會如何3)對方與我相差之歲數?謝謝您!

鈞洋答:命屬弱金生六月,五行土燥兼夾厚而埋金(犀利過你樓上嗰位兄弟),必須用水潤土、再用壯木疏土,本來坐下夫宮亥藏水木為喜用,奈何水旺自然剋火、唯獨命卻視火作夫星,加上太陽守子垣……1).唔出國睇怕嫁唔去!2).42歲之後丙子天合地合睇下個天會否眷顧你?!3).一係大8年以上一係細1年有多。

1996.我姓吳,女性。出生地廣東惠州。請問我什麼時候嫁人比較適合呢?我現在喜歡一個男孩,但是家人不同意,所以只能分開。我的命運會是怎樣的?婚姻及家庭事業會是怎樣的?還請先生指點迷津。順便問問,我現在從事外貿跟單,可是並不大喜歡這份工作,想去做老師,能告訴這個選擇正確嗎?萬分感謝!

鈞洋答:吳小姐,你應該問;我何時可以嫁得出較恰當。老實說話,以你金水傷官生冬令命格、水旺夫妻宮,命以火看丈夫、見火入夫宮水必去相剋,加上武破陷宮守夫宮而左右空劫夾入,條命能真洞房確係奇跡,有幸結得成婚而不剋夫、更可以列入奇命觀之。由於金生水而水旺,此生肯定作育英才而被晚輩少年勞役,做老師當然正確、甚至生得光榮,……

1995本人姓劉,女,本人最近經朋友介紹找了一個師傅算命,結果是太陰星坐命,但我用了很多個線上排盤網頁得出的結果都是武曲坐命,而我本人亦是一點也不陰柔細膩,是粗豪不拘小節且好動之人。本人懷疑到底是該師傅算錯命、還是網上排盤出錯?幾經印證,決定去找那師傅理論,唯獨佢咬定我係太陰守命,因為我係夜子時出生,應以下一日的星去排盤,請問其言是否悉實呢?或我又有甚麼理據可以說明他是錯呢?

鈞洋答:你的而且確係武曲化權守命嘅,嗰個師傅起錯盤矣!全世界不論政府抑或民間、冇邊一忽地方係夜子時當做第二日計算噃!否則唔會有所謂新年0晨0時迎接第一個BB出世嗰支開心歌唱喇,你揾嗰個師傅認真唔化!

1994.本人姓曾、香港出世、男性,本人一生事業如何?因9月公司裁員,會找到好工嗎?會和太太白頭都老嗎?我和太太幾時會有bb?我同我太太出生日期一樣。

鈞洋答:兩個冷都係屬太陽丙火而五行火炎木燥,你時干透出雨露癸水卻缺金,至於所透嘅癸水冇好過有,事關太陽見雨露必落得個天昏地暗、一世人有錢又煩冇錢又煩,改名叫阿繁包冇改錯,嘻嘻!太太夫子宮位辰酉合金比你靚得多,加上佢一路金水運際遇也比你好。當然你哋兩個可以白頭到老,至於生BB睇下今明兩年啦,機會幾高架!明年事業運比今年好,真正好運則要待48歲過後。

1993.我叫阿悶、女性,我至今沒有男友、沒財富、沒事業,是小職員一名。請問:(1)我今年09年有否轉工機會?我申請入職公務員、可有機會? (2)幾時是人生好運?(3)將來財運如何?

 鈞洋答:三毛喎,唔講得笑!條命丁火見壬癸官殺混雜、加上五行土旺食傷重,唔煩有鬼喇!1).09己丑,傷官見官而地支更刑沖兼備,轉得成工都唔慌有着數,倒是明年庚寅機會大啲,你條命係做公務員材料。2).41歲入寅卯辰傷官佩印先有好運行。3).唔過六十幾難富有

1992.本人美玲、女性,曾經給人看掌、左掌上生命線斷開,說我中年會有生命危險!從我的命格來看是真有此事嗎?,結婚已4年媽媽冇得做,將來會有小孩子嗎?我的晚年會很孤獨、悽慘嗎?

鈞洋答:丁火生冬令、天干透雙甲丙火,成條命官清印正而木火通明,除非老來嫌命長而度頸、否則83歲後至有機會輪到你見耶和華,只不過疾厄宮太陽天梁守卯垣、纏地劫擎羊,婦科腺體生育……等等血光不免。印入時柱剋子女在所難免,除非老公五行火旺否則唔睇好生育。

1991.我姓邱、女性、香港出生,現在留學澳洲,今年6月份就正式大學畢業,有一個拍了三年拖的澳洲藉男朋友。我對前途非常困惑,該留在澳洲或回香港,不知何去何從?還有最近家中長輩口角頗多,經濟不佳,想問好運何時會來臨?

鈞洋答:你係雨露癸水生午月命,八個字之中,年月嗰一半係木火而化忌,日時呢一半係金水為喜用,換言之要糾集外來一切力量去劫奪父母祖宗嘅福蔭,因而木火旺則冇運、金水強則福氣安康。世界以鬼佬列入金水,亞洲人算作木火,所以你一旦回香港肯定冇運行。好彩你一路金水運行到老,最快27歲好運來臨。

1990.本人有幾個問題向大師請教,請大師帮忙。1).我叫黃才勝, 由於本人這幾年運氣一直低下,無論事業、財運均很差,今年連僅有的車也給偷了,想問本人一生命運如何?2).今年運程如何,何時運氣會守轉好?3).有什麼辦法可以改運?

鈞洋答:唔係喎阿勝哥,你依家開始轉入咗好運噃!事關目前中運命宮交入大運財帛而紫府守垣纏祿存會照廉貞化祿、貪狼化祿、武曲化科。1).真正好運要待56歲打後,唯獨目前10年事業發圍唔會差、財運也不會差。2)今年命宮丑垣天機化忌,身宮亥垣太陽化忌、畀人偷咗部車咪算你執倒囉,反下手冇咗份工兼夾失埋個愛人都有知!明年幾好,之不過不利女性人口、猶其老人家和妻子、女友。3).你夠膽咪搵「改運大師」歐陽國富做囉,有大改小改添架、嘻嘻!.

1989.我姓周、女、今次巳第四次send了,可惜次次都抽不中!!希望今次中啦~1)我想問婚姻如何?2)五行是否要水忌火?3)我香港出生,現居多倫多但又想回流,哪處較適合呢?

鈞洋答:姓周、今次巳第四次……咁就稱呼你周四妹啦!咁橋今日星期四又係抽到你。你條命屬田園己土,夏令四月乜水都畀地氣嗦干,咁炎咁燥點種嘢呀!必須見雨露癸水、仲要金生。1).嫁鬼才可以、嫁人聽傷心!(唔分離必刑剋)。2).上面答咗!3).香港地處東南屬火土,多倫多係金水地,你話呢?目前行庚金生水運,如果你自問入咗藉算係半隻鬼(鬼多多、人少少)咁就可以回流。

1988.本人姓名:陳X洋, 男,出生台灣台北市,學歷大專程度,已婚;本人平時不亂花錢,亦可說也沒本錢可以揮霍濫用,但總覺得此生自今的工作變動很大,運程感覺很不理想,情況好時,所賺到得錢僅能打平生活基本開支,但卻存不到錢,情況差時,生活還必須向親友借錢渡日,此種情況已長達10年以上,因此想請教師傅,自己何時才能轉運?今年、明年工作變動是否還會改變,宜從事何種職業才賺得到錢,且存得到錢,何時可以穩定下來?

鈞洋答:壬水命生酉八月,仲秋月令水靜河飛,個人有優雅清高氣質,唯獨機月同梁命空劫守財帛,60歲前頗難積蓄金錢。54歲過後進入武貪纏鈴星運,會殺破狼,雙祿存守財帛,相信突發由房產得財。今年正好試行54歲後武貪運,事業或許有改變,惟財運不算差。明年事業利好唯獨財來財去意料中事。

1987.一個很偶然的機會打開了這個網站。我是女性,姓Z去年來到英國讀書。對於事業和姻緣有些迷茫,懇請師傅給予指點。1).事業在哪里發展比較有利?宜從事什麼職業?大概什麼時候有財運?2).幾時能夠嫁出去?對方大概是什麼年紀,國籍,職業,家庭條件如何?姻緣能否順利?3).我有沒有子女緣?

鈞洋答:你命屬弱金(辛金)生酉月本來並不弱。唯獨地支巳午未南方炎炎烈火足以熔鋼化鐵,喜用金水而大忌木火土。1).英國是世界正北所以首選,其次是歐洲美國,亞洲地區利少弊多。2).35歲後可以嫁得出去,必須嫁老外、年齡長你7-8年左右、又或年輕一年以上。夫家人口多,給你壓力也不少。在外國較順利。3).五行欠水,加上斗數刑忌夾子女宮緣份極薄甚至虛花。

1986.本人WAIWAI,很欣賞你的為人風趣呢!我是庚辰日生,在網上看到庚辰是魁罡格,大多婚姻唔好,剋夫!1).想知我是否嫁唔出?2).未來會唔會嫁得好老公,有幾多子女? 3).黑左好耐,幾時有運行呢?

鈞洋答:魁罡唔一定婚姻差和剋夫,前者「和番、通番」可以改運,後者依家甚少男人好似以前咁化學會被刑剋。1).嫁得出,保證唔使禊灶罅!之不過要經歷滄海噃,事關你陰陽守遷移未垣,會照天梁化科夫宮亥垣,呢兩年有機會真洞房、唯獨35歲後「先結後分」,約莫42歲左右再結過,呢勻到老矣。2).老公唔差,略嫌濕滯而矣!子女兩個度。幾叻,比老公可靠。3).晒黑咗?嘿嘿!明年2010年會白番。 

1985.1).我和丈夫可以互補不足之處嗎? 誰旺誰?2).他現今至未來10年的工作運及財運如何?他近數年兩者皆不順。3)."實質"為人性格如何,會有外遇嗎?有古惑嗎?4).我未來財運及健康如何?茂太 

鈞洋答:1).你條命係金水傷官生亥月、五行寒過寒湘子、躁過河東獅。至於你相公則火土傷官生六月、四柱燥過撒哈拉、囂過社民聯。如是者一個剋夫一個傷妻,負負得正、大家旺大家(大家樂)。2).由於你相公個人喜用金水,自己唔到56歲後難有好運行。3).你相公貌似老實,其實……哈哈!也都老實,你咪疑神疑鬼啦!4).鬼咩!你五行欠火而一味水旺化忌神,亦係唔過56歲冇運行。

1984. 我叫珠珠、女,香港東華出世,(1)想問姻緣,我幾時嫁得出呀?真命天子會係咩人?會有小朋友嗎?(2)我雖然讀左大學,但係行年廿九一事無成,宜家係做SALES,我適合咩工作呀,會有一番作為嗎?(3)健康如何?我之前試過全頭頭髮甩光哂,好擔心健康呀 

鈞洋答:阿珠珠,你條命丁亥日柱生九秋被土洩,必須用木制土而喜水生木,1).丁亥一柱天地相合為用神、明顯夫妻同心,32歲後有機會安床真洞房(唔會假喇!),對方係外來人、幾識講嘢卻有啲多神經質。仔女?梗係有啦,仲好叻添!2).冇法嘞,阿珠珠!你乜都要等32,目前辛丑運時柱犯伏吟,冇樣嘢稱心如意。3).嘩!乜咁慘呀!你小心現時嘅伏吟運仲有婦產科方面之濕滯嘢搞。

1983.我姓盧,係女性,生於上海,現在在美國,到了這個年紀其實我還沒好好地談過一場真正的戀愛,我想知道自己的婚姻和事業,我困惑重重,亦不再有年輕時那份對未來的計劃和憧憬,過去兩年裡的挫折對我的打擊很大,現在幾乎要對自己失去信心,請先生幫幫我,指點迷津,非常感謝!

鈞洋答:你是機月同梁命天機化祿守午垣,會照太陽羅網沖太陰化忌,天同天梁化權,六煞同度。本身有如夢中人,一生環境多變不能安逸,終日心煩意亂無所適從。事業必須離鄉別井,在歐美方有發展。婚姻不看好,縱使嫁老外恐怕也仳離告終。過去三年俱挫折於遷移宮,明年有利轉工調職卻不利愛情,最煩惱是天同化忌會照太陰化忌,除三角關係外更大機會受負累於女性、還要破財。

1982.我叫張X娟、女,在廣東出生。我想請大師您幫我看看我的真姻緣什麼時候到會否一婚到老?對方是個什麼人, 年齡?

鈞洋答:你的命係屬火、雖生冬令惟五行火並不弱,只不過命卻以水看男人、以火看同類,五行火既多、猶其會聚於夫宮,多數瘦田無人耕而耕開有人爭、情敵肯定不會少。32歲後丙辰運遇上金旺年份真姻緣(真洞房)機會較高。不敢保證一婚能到老,因為42歲丁巳運與日柱犯伏吟而不利夫家人口及婚姻。年齡雖無明顯差別之啟視,唯獨對方從示技術職業或偏鋒工作則幾乎可以肯定。

1981.小女子姓何,在香港出生,想問老師幾時有姻緣結婚生子?我很喜歡小孩但一直遇不到好姻緣年紀漸大,請老師指迷津

鈞洋答:丙火命生冬令而地支會水局於夫宮、月干透強金生水,如斯又寒冰嘅天時少啲陽光都唔掂。你命中以水看男人,天寒地凍遇上嘅人大多數均係三毛(無財、無情、無堅)。斷估要入42歲巳午未運婚姻先至會完美。照計2012年有姻緣,2013年「有蛋生」。

1980.廣州謝女,最近認識了一位男子、他曾經結過婚,並有一子,是東北大漢,母親是滿族人,請問師傅:1).男友是否是真命天子?因熱戀期過後,他不再提結婚的事情,讓我擔心吃“詐糊”,又衰多一鑊。2).如果他不是,什麼時候才有真姻緣,對方是什麼樣的人,會對我好嗎?3)..我什麼時候能有子女,將來能孝順嗎?4). 有人說我2010年動馬星,會失去原來所有好的東西,並耗財,我心埵n害怕啊!有什麼辦法可以避得開啊?

鈞洋答:首先係你條命庚金鋼材生申月、金強宜用洪爐火冶煉,惟五行卻水旺滔天而剋火有餘,斗數太陽化忌守命而一世不利男性。1).男友五行土多剋水而喜歡金水相救,理論上和你幾夾。唯獨你未來將轉入(申子辰)水局傷官而入夫宮運,縱使有望畀你結得成婚而尚有一劫在後頭。2).看來47歲後方有機會遇上有結果之姻緣,由於你太陽化忌守命,與命中有關係之男人相剋,如果對方對你差D反而好事,恩愛的話必有劫數踵至。4).命以水看子女、化忌,既然化忌入夫宮即是說一有生育必然剋夫。命中子姪、下屬……不少,唯獨子女無緣。明年庚午有好的變動、同時亦有「中大附小」機會,看看會否先有身孕而奉旨成親?!

1979.小弟張仔()、香港出生,1).小弟在英國的大學快畢業了,畢業後想投身香港警隊,未知我的命格會否適合,會否有貴人相助,還是不值一提?2).小弟一向的人緣/異性緣不見得好,到現在也未拍過拖,未知我一生是否這糟糕?我的真命天女會何時出現呢?

鈞洋答:條命鋼材庚金生丑月,寒冬鋼材有如爛鐵一堆,要有洪爐火煉方能成材。1).用火煉鋼、而時干透丁火日支坐午火係正官為用,加上五行「正財、正官、正印」併透天干屬於「財官印三奇格」。擺明成條軍佬命,唔當差哂乜哂!將來行官運到老、肯定處長級退休。2).鬼叫你官星會聚妻宮,斗數太陰化忌而紫府守命、身宮在妻宮破軍同度,個人既率直老實、擔X唔偷食,除非人家MM盲頭烏蠅撞埋嚟,否則幾難敢採取主動去溝。真命天女明年(虎)年出現。

1978.想麻煩師父幫我算算姻緣,之前有寄郵件請教師父的,但是幾個月了還沒看到答復,擔心郵件沒寄出。我姓陳,女性,想請問師父,我的姻緣幾時會到?真命天子是怎樣的人,和丈夫關係如何?

鈞洋答:庚生二月,地支朋刑入父母宮、夫宮。加上斗數太陽化忌子宮守命,身宮在遷移午垣、天梁天壽同度,由於本命不利男性緣故,若然不離鄉別井的話、直有齊大非偶之嘆,恐怕虛度三張也嫁杏無期。將來丈夫係豐滿之人,年齡應該比你長十年以上,老實自律性強、唯獨欠情趣而索然乏味。

1977.我姓李、女生、香港出生,想請師傅看一下幾時會結婚以及結婚物件有什麼特徵?

鈞洋答:庚辰魁罡生二月,用濕土而喜火生土,天干透丁己有用、算得上係靚命。斗數機陰守寅垣纏天姚照祿馬,三方四正機月同梁而天同化忌守財帛,太陽化祿纏天壽地劫。照睇34歲前嘅太陽化科運可以嫁得出,特別留意2010年。哪個「物件」應該係番鬼佬(又或鬼藉華人),年齡多數大過你7-8年左右,亦講唔定細你1年以上。對方雙親不全,眼型大細超,有為之人但衰多口。

 1976.我姓梁,女性,出生在香港,未婚,老闆。主問姻緣、是否外地姻緣才好? FLORA

鈞洋答:甲寅日柱生六月,天干朋透丙丁火,用神用水喜金、唯獨五行缺金而水則弱過鬼。命以金睇男人看丈夫,既然畀火燒加上燥土不能生金、梗係西方世界嘅姻緣為佳啦!唔單止係咁,假若非外地姻緣,就算嫁得出亦會衰收尾。 

1975.本人姓李,男,香港出生,現居美國,希望師傅能指點迷津。1)我的姻緣運如何?2) 我與L小姐八字相合嗎?會否有將來?3)我的事業運如何?

 鈞洋答:壬水生巳月五行用水喜金,但見地支寅巳申三刑逢沖,條命大利歐美、乘龍也不能回東南亞。1).32歲後方入亥子丑北方,利姻緣及生育,看來要等多陣矣!2).佢條命金水俱旺而用火,遇上你肯定嗒糖,兩人八字天造地合。3).32歲後一帆風順,娶妻得力而大有發圍。

1974.小姓李、男、香港出生。想知道本人何時行財運?現正打工多勞少得非常辛勞,仲有健康情況,多謝指點。

 鈞洋答:己土生申月,五行金強水旺加上全局天剋地沖,能夠有份牛工打而兩餐安穩算係稱心如意矣!目前計落有15年財運行,之不過人哋身強行財運多數有得享受,至於你身弱入財鄉擺明挨得更辛苦,好處不過係唔愁失業而矣!健康小心心血管、腎系、泌尿系統……都有毛病。

1973. 姓凌、女、香港出生,現住多倫多。8月剛失業、跟住和拍拖一年的男友分手。想問:1).何時才可找到新工作?2).和男友有機會復合嗎?3).如沒機會何時才再遇到下一個?會比現在的好嗎?

 鈞洋答:丙申日柱生未月,四柱火炎土燥而用水喜金,係火土傷官用金水格。1).今年秋後應該搵到新工,但明年肯定比今年有進步。2).我睇未必會復合喇!事關明年有機會換畫,舊嘅唔走新嘅點嚟呀?3).你條命金水為喜用而喜用會聚夫子宮位,肯定嫁個鬼佬生叻仔,34歲後姻緣到、一夫終老。

 1972.吳老師您好,本人姓蔡、女性,本港出生、剛與男友分開,現單身,一直很希望能找到心儀對象組織家庭,(1)想向師傅請教本人的適婚年齡、(2)適合的對象年齡背景職業、(3)零九年姻緣、(4)何時有真正的姻緣出現?謝謝

  鈞洋答:癸水生正月、木強洩水用金劈木生,仲有係初春餘寒未了喜陽暖火調候。1).依家運行驛馬鄉,睇怕做嘢要奔波甚至出外,34歲真命天子有機會出現,好可能係外族異性(或持外國護照華人)。2).口才叻略豐滿、有米之人,大你不過幾年。3).09年有可能換畫,否則對方六親不利。4).真洞房睇好2013年。

1971.我叫曉軍、來自上海、女,我想知道二個方面:1).我2009年事業如何?因為最近遇到公司人事變故、有小人害可能會失業,想請你指點一下。2).我的婚姻如何?不知何時才能有正緣結婚,會嫁得好嗎?以前有算過,說我將來的老公和我是千里姻緣,而不是當地的。

 鈞洋答:癸水生酉月而金白水清,喜火溫暖,命中地支兩重巳火為用神。1).流年事業不差,有貴人、上司、長輩……等等關照,也有機會交上男朋友。2).33歲後真命天子會出現,不排除今年遇上的是真。由於你夫宮坐巳火驛馬,我也認同會千里姻緣。

1970.小女子阿敏,香港出生,今年打算做老師,想問事業運如何?我一直沒有拍過拖,愛情運是不是很差?什麼時候才會遇到真命天子和結婚呢?

鈞洋答:殺破狼命、武貪化科纏天壽守命,會廉破祿權守財帛。顯示一生積極求財,係列入周身銅臭味嘅「融資」格,與做老師格大相徑庭。今年或者可以當「人之患」嘅,惟長久而言多數轉行。27歲後先至有拖拍,真命天子睇怕2012年先至出現。

1969.本人姓周、女、巳婚。請問我一生何時行好運?衰運?婚姻如何?在香港還是加拿大較適合我生活?

鈞洋答:己土生午月,天干透丙丁地支會南方,五行火炎土燥、土地龜裂不能種植,此刻急用金水作調候,終身大利歐美西方地域。33歲行入好運直到73歲,唯獨37歲後戌運必衰五年,驚住到時婚變並剋夫家人口。

1968.本人Anne,女性,香港出生。想問大師以下問題:1).姻緣及對象之為人?2).一生的事業運?

鈞洋答:命無正曜,借遷移未垣太陽太陰為用,夫宮坐亥垣天梁落陷,天機化權纏天壽天姚酉宮財帛。1).終身易纏三角關係,第時個老公多數大過你七八年或以上,必須終歴挫折方許姻緣。對方為人雖然濕滯腌臢、但亦有少許才藝嘅。可能異地姻緣甚至異族通婚。2).利專業策劃、費唇舌工作,一生有名氣,只不過名大於利。

1967.本人姓吳、女性,香港出生。想問以下問題:1)我想到外國進修語文,但又擔心回來香港之後會找不到工作,我適合到外國進修嗎?2)對於現在的工作有點迷惘,我的事業運如何?3)我的姻緣運如何,會結婚嗎?對方會是怎樣的人?

鈞洋答:目前運太陽化權天梁守卯、對沖文曲化科雙祿於酉宮遷移,會照天同巨門化祿丑未,太陰獨坐亥垣財帛。1).太陽天梁擺明文學,遷移文曲化科纏祿存…..仲唔係驗出國求讀?我覺得你多慮喇!五行喜用金水、西方絕對大利。2)34歲前運程麻麻,出外先至有運。3).同樣34歲後先有機會真洞房,對方外形臉圓背厚,性格溫文卻略嫌陰濕,應該結過婚。

1966.我姓呂、男性,因家庭問題令我30歲前的積蓄化為烏有。 本人上年尾結婚,想請問:1)因太太在我有困難時幫了我很多,想儘快給她安定的生活,所以想請問財運如何?何時才較順暢?因我想買樓,但現在總是財來財去、不能儲錢。2)事業如何?3)如果要小孩,何時較好?

鈞洋答:地支子卯、辰辰,子刑卯、辰辰自刑,27歲後行入酉運,全局好似世界大戰(子卯酉三刑逢沖復辰辰自刑),如果淨係積蓄化為烏有而冇人命傷亡已算係執番一身彩。1).33歲到48歲頂龍刑剋老人家,生活可望安定。至於財運,由於你屬寒冬壬水急用火調候、火在你命中為財星,唯獨五行卻欠火,必須43歲後入巳午未南方運先至可以旺財置業。2).事業在37歲後更諸多變動,可能出外。都係43歲後才有發圍。3).你條命視火作用神,五行缺火子息必弱,唔排除有女而冇仔。

1965.本人梁☆鳳,女性,廣東陽江人氏,請問:1).幾時能結婚,.能否嫁得好?2).事業發展如何?

 鈞洋答:五行癸水生冬令亥月、四柱全金水,用陽光(火)調候,喜燥土築堤以防洪。1).必須異地姻緣,看來35歲後方姻緣到,一生易纏三角關係,但結婚後夫妻得以到白頭。2).35歲後事業財運才有轉機,中晚年小康以上而財運豐厚。

1964.本人名偉力,男性,想問大師我何時有好的大運? 我一生的事業順逆高低如何?我何時會有真姻緣,有幾多名兒女?希望你會抽中我,多謝!

鈞洋答:吳大師我手執皮鞭巡視天下,睇下邊個曳就揮鞭抽過去。今日遇上偉力哥,你唔好彩矣!如你所願、一鞭過去立刻抽中……哈哈!唔使驚青,講笑咋。弱木生九月、五行金強劈木,本來宜用水洩金生木、奈何五行欠水,唯有用火剋金,用得辛苦亦勞氣,條命最適宜離鄉別井出外發圍。23歲後開始有運行,不過辛乜苦而矣!真正好運响53歲後,由於五行缺水之故,小心肝、泌尿、腺體……疾。27歲後真洞房,第時畀老婆食住,命中有女冇仔。

1963. 本人經常瀏覽師傅的blog、發現師傅算命了得之餘、行文用字亦見風趣幽默,很是喜歡。本人姓鄭(女性),本人想問能否和依家的男友修成正果?但他是已婚我們交往了約2)coz我真的好愛他.... 他會是我的真命天子嗎?我應該從事咩行業?coz今年都想轉工

鈞洋答:我睇你唔過43歲都幾難和依家嘅男友真洞房,事關你命屬癸水生冬令地支亥卯未會木局入夫宮,天干透戊土作合癸水唯獨合而不化。須知道癸水視土為夫星,視木為傷官。既然傷官(木)入夫宮,肯定見土必剋而不能相容,唯有見火焚木先至有救。你嗰個「寃家」五行火旺,首先同你五行幾夾,其次係你所屬癸水既被戊土合住想甩幾難。目前行己卯運有排都末能修成正果、呢拾年點都要玩住煮飯仔、假洞房先。43歲後行庚金開始採取主動,53歲後入巳午未南方火鄉、運助「戊癸」化合,嗰時才真正白髮齊眉。

1962.本人姓馬、女、結婚十多年有一子。最近發現左丈夫有第二個女人(大6女仔得19歲),現分居中冇彎轉個隻。問:1).我會否有第二段姻緣還是會孤獨終老呢?2).我有子女福享嗎?

  鈞洋答:丁亥日柱生冬令,五行全金水、獨時干透甲木為用神(即係响大海之中攬住過水泡救命)。1).五行視水為男人(包括老公)卻以水為忌神,即係話你一世都要畀男人累、想甩身冇咁易,之不過54歲後入火旺運將會有所改善,應該有男人陪終老。目前運程就算有第二段姻緣一樣喊得一句句。2).話明時干甲木為用神將來個仔肯定叻兼且孝順,之不過要離鄉別井出外讀書發圍。

 1961.吳師傅你好!我叫Amanda。女性。在國內出生。頭兩胎都係生女。請問如果今年懷孕,生男機會大嗎? 我嘅子女運如何? 一生有冇運行呢?健康如何? 感謝萬分!

鈞洋答:認真要努力做人仔呀!Amanda,事關你命中太陽化忌守子女宮(好彩係响寅垣咋!)。明年命宮寅垣太陽雙化祿纏祿存、而天府化科入大運流年子女宮,論理你有機會博懵成功一索得男。43歲後開始有好運行,但小心婚姻出問題。疾病在婦科、生育、乳腺……

1960.我是您的長期讀者,祈望吳師傅能為我指點一下姻緣運我姓曾,女性,未婚,香港出生。請問師傅我的姻緣運如何呢?有何方法可以增強姻緣運呢?改變性格可以嗎?

鈞洋答:紫微貪狼守命卯垣本來桃花旺極,奈何貪狼化忌喎!須知道紫微係皇帝、稱親帝多數咸濕,若然側邊嗰個貪狼係奸嘅話、唔使問阿貴肯定時不時帶皇帝周圍滾而驗證「桃花旺盛」。唯獨萬中無一遇啱嗰隻貪狼忠就忠喇卻係廢柴一個、只會做唔識WET,如是者你咪一樣囉。40歲後保證嫁得出,之不過個老公係搶番嚟!事關貪狼化忌會照殺破狼而破軍化祿,好似冇乜嘢係晤需要同人爭。 

1959.我姓黃,出生於大陸,女性。我年紀已經不小了,看著身邊的朋友結婚生子,總有失落感,不知什麼時候能結婚呢?將來的丈夫什麼樣,他優秀嗎?

鈞洋答:丙火(陽光)生二月,最需要江河水(壬水)照日而泛影浮光以顯春色。命同時以水看丈夫,奈何你五行缺水,乾巴巴的大煞風景,看來要過中年才有姻緣,去外地尋覓才有幸福。外形胖嘟嘟,是優秀的中國人,哈哈!

1951958.大師您好,我姓畢、女,,懇請大師看一下我的財運和婚姻。

 鈞洋答:你的命不差「福氣又安康」。天府纏天壽祿存巳垣會照天相天刑同宮對沖廉破卯垣,福德武曲貪狼化祿照財帛末丑、昌曲魁鉞同度。整個格局是專業求財命,可臻至管理階層,32歲後方利姻緣,只不過丈夫可能結過婚在先、否則好大機會有外遇。

1957.師傅,記得你2004年為我屋企堪輿風水時說過到2010年係六沖年分,應該再大執一次以正式入八運,是當真嗎?Novel

鈞洋答:冇錯!事關飛星有「兼盤」運初之五年多兼上一個運,之後正式才進入新嘅運。由於我採用「六合八法」為基礎,係依循星盤合凶化吉,若然運盤有出入的話、必須重新擇日佈局。2004「甲申」一2010「庚寅」正好逢六年一沖而天剋地沖,沖開烏雲見青天,執過風水有着數。

1956. 敝姓李、是女生、台灣人,未婚,麻煩老師幫我看看姻緣,謝謝!很多老師都斷我戊子年因流年與日柱天地鴛鴦合一定能嫁出去,但那年連個對象都沒看到,錯過了戊子年還會有機會嗎,會孤獨終老一生嗎?

鈞洋答:癸丑日柱生冬令,時柱立戊午,戊癸化火但合而不化(因為失令之故),惟戊為夫、我為癸,夫有合我之意奈何不當令而合不成、嫁不出,必須火地運才助化有機。唉!你49歲方入丁巳火鄉運,俗稱丈夫為老伴、到時真的求得「老伴」矣。至於戊子年兩戊土爭合癸水、恰似「嬲」字,流年怎可以洞房呢?哪些老師瞎說八道!

1955.你好,我叫阿欣,今日突然在網上找到師傅的網站,真是天意安排。最近為了感情問題很煩惱,家人覺得現在的男朋友對我不好之前睇相就說我的對象一係大過我(越大越好),一係要細過我我依家又暗戀其他人,唔知點算好﹖想問吳師傅我的姻緣。我係咪一定嫁依家個男朋友,還是有新感情﹖

鈞洋答:明年雙祿會照夫宮申垣太陽巨門,八字日元乙木合庚而地支三刑逢沖,唔排除換畫。若然真嘅結婚、則小心個人生育血光及長輩刑剋。

1954.本人叫範X東,男,出生于河南南陽,現居廣州,至今仍未婚,也未有對象。1、想請教吳老師我何時能成婚?一生婚姻是否幸福?2、另一生財運如何?何時能有財運?目前為一公司普通職員。3、一生身體健康如何?會否有什麼大的病症?多謝吳老師!

鈞洋答:東哥哥,你條命火炎土燥、恰似大火燒通頂,必須行入水鄉才有較佳際遇,何時有好運行呢?看來要過41歲後。1).36歲前有機會結婚和生育,40歲前有一次挫折、不排除離合。之後旺妻益兒終老。2).也是41歲後才有較順利之財運。3).一生呼吸系統和心血管、眼……均多毛病,惟險症大病過71歲後才發生。

1953.我叫蕭X龍、男姓 、臺灣人,我想請教老師3個問題 :  1). 以八字來看,我在大運30~39和40~49的時候,適不適合出國到日本就讀大學,畢業後在日本工作?2).適合唸行政類科還是數學、理工科?3).我適合的工作是什麼?

鈞洋答:隆冬濕木最佳用神是時干丙火、調候兼光合作用, 30~39當然適合出國到日本就讀大學啦!畢業後在日本工作,事關東洋木旺幫身兼生火正好合你命中五行需要。40~49剋妻意外。2).唸行政類、金融……科目較適合。3).傷官生財命,動腦筋求財工作於你最合。

1952.好耐之前EMAIL過你不過唔見有回覆,但我真係好想知我感情發展將會點。請問同1981年1月X日既佢有無機會呀?會嫁得好嗎,將來既老公會係點既人呀?Ms. Fu

鈞洋答:壬申日柱生三月,五行火土俱旺而喜用金水,喜見日時申金驛馬重逢、即係話第時好有機會嫁個老公係響外地、甚至蜷毛勾鼻嗰種,仲有係周圍走無時停,外形眼大大口水多個茶嗰隻。38歲前結得成婚都有變數,過後旺夫到老。至於嗰個哥哥仔,理論上同你五行都幾夾,之不過佢一世人容易畀錢銀女人累,唔敢包能幸福終老。

1951.本人林正忠,男性,希望大師指點迷津,什麽時侯我的事業和生意好轉

 鈞洋答:壯木冬生無暖、五行寒過韓湘子,滿盤皆土兼刑沖而顯得財多身弱,加上斗數太陽子垣落陷守命…..若然不離鄉別井恐怕一如韮菜命「長少少就畀人割」。2010年好過今年  

諮詢及留言