答讀者問(2051-2100)

    (由於本網站廣受歡迎,國內外讀者電郵問事與日俱增。而我答覆來件務必親自作答,絕不假手於人!同時只限於在網上列出,不設個別私下回覆。但因問事電郵實在太多,實在無法一一解答,由即日開始,將會採抽簽形式解答。情非得已,謹此向向隅者致以深切抱歉!

    此外本人答讀者信有三種情形不作答:1.分不清來信讀者性別2.搞不清出生日子是農曆抑或國曆3.沒有姓氏稱呼的來信。敬請來信讀者注意上述三項問題。)

文.吳鈞洋

2100.晚輩出生於台灣,請問老師,我的官殺是不是太強了!!有制化嗎?如果沒有要怎麼辦才能逢凶化吉呢? 我的命格能順利考上法官嗎?

鈞洋答:癸亥日柱,五行缺火、四柱俱濕土,獨喜時支未中藏丁。急用陽光火調候,喜坐下亥中壯木疏土,現運丙戌、今年庚寅、官印相生見財為用,必能如願利於考試。總之最利當官,但是否考法官就不得而知矣!

2099. 本人是姓陳女生,很不幸的一步步進入姑婆的階段,我還有機會嗎?如有的話老公是怎樣的人呢?如沒有的話應否搬出來自己住呢?

鈞洋答:中旅啫,有排都未到小龍女嘅姑姑階段!之不過你庚寅日柱生酉月,成個打女格、威過小龍女,少啲火都制你唔掂。五行用火煉鋼、喜壯木生火、更以火睇老公,35歲後行午火運會入夫宮化用神、可以真洞房。但今年庚寅太歲你日柱犯伏吟係冇料到嘅、等明年啦!

2098.余阿立、男,生於加拿大mountain time,半工讀,教授上個月通知留班,可能遲下要逼轉系。請問師傅前程如何?未來妻子長相人品如何?

鈞洋答:阿立哥,你慌唔係掛住溝女而無心向學呀!事關你機月同梁命、天機太陰守寅垣纏天刑,擺明一世畀女人累,咁啱現運命宮坐妻宮太陽化祿化權而搶哂太陰啲光,今年庚天干好衰唔衰又走埋入去令太陽雙化祿進一步奪哂陰光、留班意料中事。33歲後先至有好運行,大利操作武職或扭計事業。第時個老婆好似係鬼妹,矇豬眼多嘢講,一世旺你卻畀你剋,乜叉病都有啲!

2097.本人姓沈、女性,關注師傅博客多年。自己覺得一直來未有太大的變化。希望問及本人姻婚。因為一直未遇見適合的人。另在工作上也未獲理想,總是變動。請問以後姻婚運如何?姻婚是否喺外地?是否有姻婚後,工作才可以穩定。 

鈞洋答:武貪化忌守命纏地劫,會照殺破狼而廉貞破軍化祿守財帛,六煞三方四正會。女生男命而不安現狀,所以變動係你嘅理想、革新係你嘅食糧….咁嘅命一世都要經歷三角關係,如果早婚的話、就算唔離婚亦剋到個老公冇啖好食。唉!除非你離鄉別井出外啦,否則36歲後至會有好姻緣,至於工作到老都幾難安定、之不過越變越好。

2096.吳老師你好!本人姓周,女生、香港出生。現打算買樓,請問我應選擇什麼座向呢?座東向西有無問題呢?

鈞洋答:買樓最緊要係地域,即係夾啱自己五行嘅地方,好似靚女你條命咁、夏令田土傍住火燄山,乜叉都難種植、礦又採唔倒,必須大水調候、強金生水,金水旺西北、所以你本身大利九龍而不利香港,九龍則適宜界限街以北及整個新界區。 座向最利東南西北之正中線(四正),宅內多東四窗最煞食(南、東南、東、西南)

2095.本人李小姐、香港出生,拍拖多次,想知何時結婚?上年生意不俗,往後怎樣呢?是否适合繼續做生意呢?

鈞洋答:丙火日元生午月,會咗個火局響夫宮,咁鬼旺火、做拜火教聖女就綽綽有餘,恨嫁?唔入44歲咪使旨意!34一43係衰運,乜都有人爭、愛情如果唔係有第三者介入就肯定身為第三者。命以水睇老公和事業,依家開始步入佳境,今年除咗生意繼續旺之外、更有桃花纏身,2012年真命天子有機會出現,講到真洞房可能要遲少少。

2094.Sugar ,女, 現在廣州工作,今年2010我屋企發生咗不少事,老豆老母病咗,花咗唔少錢,又其系老豆,花得更多。我系間公司做咗3年,但系我嘅工資一分一毫都冇加到。呢家仲系一個人,想找個人(對象)幫下,但系姻緣遲遲未到。人又老,錢又冇,冇對象,連份好D嘅工都冇。想問一下我嘅事業同姻緣。我幾時才可以在事業上有所進展?幾時可以結婚,老公系點樣,這是我的八字,請幫我看看。

鈞洋答:嘩!阿糖糖,乜咁慘成咗「三毛」小姐呀!聽講,普天同慶夜出世嘅聖胎條命點都硬啲、有排挨架,哈哈哈!條命屬水卻生響農十一水月,八個字中着咗六個字係水。好彩!毛主席響月干透出(紅太陽:丙火),養得大全靠佢咋!你係遲婚命,47歲前姻緣多波折,之後旺夫旺財終老。記住,你條命男性緣極薄、不單刑剋並多是非同尤怨。今年之前嗰三年係「似水流年」衰到貼地好正常!年內一定識倒男朋友,唔理有冇結果,起碼有拖拍住先。

2093.本人性楊、女姓,香港出生,拍過一次拖咁大把但只是不歡的情劫,之後感情空窗多年,感覺尋找另一半很難,請問我是否命中姻緣簿,有辨法改善嗎?我不想情人就是工作咁過世,命中適合什麼人?真命何時出現,嫁得出嗎?有的話會是什麼特徵?一生事業和財運如何?有網上創業運嗎?

鈞洋答:庚金生酉月會金局,丙火透時干會火局地支,八字叫佢做羊刃駕殺格,以前屬於女將軍之格局。依家列入揸倒Fit嘅女強、起碼好似網上流行嗰個四槍攞賊命之女警官。呢種命等閑靚仔邊戍埋得身呀?至少會嫁個掌得權話得事嘅偉哥!遲婚命,睇怕34歲後至嫁得出,44歲後旺夫到老。

2092.老師、我是Ann,香港生,女,你既見解又到point又爆笑, 希望有緣抽得中啦~~1)想問問姻緣呀,幾時先有呀? 將來老公如何?2)事業同財運點好呢,keep住做藝術得唔得呀?

鈞洋答:恭喜你!阿Ann,你到底逃唔過我條鞭、畀我抽中,哈哈!巨日守命坐巨門在亥垣眼定定望住個旭日昇朝早巳垣,夫宮太陰酉垣纏地劫。1) 唔使問阿貴、都係生癪仔,註定湊鬼嫁遠方(揸外國護照都得嘅)。夫宮沖到七彩,肯定先經歷三角關係至可以真洞房。睇嚟今年有機會。2) 事業同財運反而冇問題,之不過揾得嚟使得去。啊!原來做藝術,講名氣唔講錢嘅!

2091.我叫龍兒, 本人想知道下半生生活會怎樣?婚姻可以一夫到終、白頭皆老嗎?我想創業做食物加工可以嗎?可以和友人合伙嗎?

鈞洋:龍兒,咪即係老妻少夫?!甲木命生午月、全局係哂火、恰似火炎山,若然冇水肯定變長炭!咁鬼炎燥、有水仲要有金生水至唔會乾涸,故金絕不能少。唉!唔好彩係五行以金睇老公,火旺、肯定熔到渣都冇剩。好彩係44歲後現運開始好境至老耄,婚姻挨得過44咪有好日子囉!屬金旺嘅行業大吉。木火,就算執倒錢都咪落疊!

2090.我姓程、女、在紐西蘭生活。請教師傅工作,姻緣的事情:1)現工作的公司變動多多,我想換家公司行嗎?2)適合什麼行業、做什麼工?3)財運如何,投資什麼合適?4)可以開店做生意嗎?5)何時有姻緣,對方是怎樣的人? 6)有比紐西蘭更適合我生活的城市或地方嗎?

鈞洋答:乙木命、除了時干甲木外,全盤                     俱強金銳鐵,宜水通關用木幫身、喜火熔金。1) 今年多數要轉工,否則會被公司移動。2)費神勞氣,又或偏鋒武職、投機投資….. 較適合。3) 不宜投機必有損失。4)殺旺無制,名大於利,縱使營商必須親力親為。5)你五行忌金卻以金看夫,本來難有姻緣,試看看44歲後現運,因行丙火陽光運,或者有機會驗異地姻緣。6)除了澳洲,沒有其他國家適合得過。

2089.本人姓余、女性,香港人而我男朋友生於1983年X月X日吉時。想問關於我們的八字合嗎?雙方應要怎樣維持這段關係才長久呢?我和他是準備與他偕老,希望不要取笑。

鈞洋答:乙亥日柱生子月、天干併透三庚辛金,寒木喜陽光,忌金生水增添寒氣。命以金睇男人、水睇出生家庭,唔好彩一世桃花旺男人多、周不時陳李張黃何…. 都有,令你煩過梵諦岡!除此之外,家運亦麻麻、猶其同阿媽緣薄、復存代溝。你嗰位男友條命寒過你,偕老?咪講笑喇!講唔定今年散埋添!你大利出外求讀及發展,43歲入火鄉至有運行,晚年得享兒孫福。

2088.我姓廖,想請問幾時才有姻緣結婚呢?謝!

鈞洋答:論財運還可以,講姻緣就唔恭喜!事關你條命水旺夫宮,一世肯定多三角關係、就算個老公好清白咁同你嚟真「洞咗房」,冇耐肯定出去搵食,呢戍講嘅搵食千祈咪開心以為佢去搵真銀噃!36歲打後可能有姻緣。

2087.本人Eva.沈,關注師傅博客多年。自己覺得一直來未有太大的變化。希望問及本人姻婚。因為一直未遇見適合的人。另在工作上也未獲理想,總是變動。請問以後姻婚運如何?姻婚是否喺外地?是否有姻婚後,工作才可以穩定。

鈞洋答:武貪守未垣廟旺宮、貪狼化忌遇地劫,擺明乜嘢都要同人爭,個人童年命帶孤剋、健康亦有神經焦慮傾向及婦科疾纏綿。首先事業出外發圍先有利好際遇,否則要過47歲入紫殺宮垣行殺破狼才有大突破兼夾旺夫。講得一啲都冇錯,就係姻婚喺外地、最佳莫如抱住個琵琶流住馬尿個款….. 和番(嫁去歐美是也)。夫宮坐天府、雖則遲婚但擔保嫁得好,第時個老公肥獅大隻、應該獅子座人。

2086.您好,我姓曹、女,以下係我八字:XX年、丙X月、己X日、癸酉時想查問以下八宇何解一次拖都未拍過?

鈞洋答:嗱!靚女,條命打交叉嘅都係木、有粗有幼有肥有瘦,以你一塊田園己土,有咁多雜巴lun枯木亂草响戍、咪即係話田園荒廢雜草叢生囉!咁點種嘢點孕育呀?打比喻你真係嗰塊地的話、係唔係極之厭惡一眾草木吖?唔好彩你五行以木睇男人,咪話拍拖咁高難度喇!睇怕你遠遠聞倒男人味都想運路行。之不過目前進入戌運都有機會黐一陣嘅,但唔担保過得42噃!

2085.本人henry、男、香港出生。特別想詳細問姻緣、事業~ ~

鈞洋答:壬水生亥月一片汪洋卻冰封…好似屎氹關刀冇叉用!不入火鄉難有好日子過,除非移民啦!仲要係澳紐先至掂噃。好彩,火會妻兒宮並且拱方會局添!我估由舊年開始,已經有盲頭烏蠅撞埋嚟矣!呢幾年可以拉埋天窗,事業運亦細眉細眼咁飄過來!至於好好環境嗰隻就非要52歲後不可。

2084.本人姓甘、女、生於HK,失業接近兩年,四年冇拍拖,很慘!何時有工返,有拖拍?另,明年流年辛卯及大運己卯冲本身丁酉日,會有多差?應要小心什麼?請提示。

鈞洋答:丁酉火生六月而土燥剋水洩火,五行缺木欠水。39歲轉運,之前五年復行戌土運,邊有運行呀!39歲轉入卯運,三刑逢沖夫宮,因住愛情離合、婚變! 出年辛卯,又再刑沖,如果拍緊拖、至多散啫。最弊係冇拖咁就大劑囉!除咗剋子姪、父系人口外,自己可能有手術做添!

 2083.吳師傅,我AMY,想請問你一些關於掌相的問題:1)本人發現自己右手的婚姻線有三條:第1條位於中間下少少,但線尾有輕微向下灣,遠看不覺,近看會見到。第2條在中間以上的位置,很長,最長的一條,線伸出向上,差些長過尾指,趨勢向尾指和無名指的中間隙位伸延,跟住與其他線相連了,有點複雜,不知怎樣形容。不過這條線的線頭起點位置卻沒有1和3線般早.. 第3條在接近第2條線上面,但好明顯是分開,這條線是向上的,其長度與第1條線差不多。三條線都差不多深和明顯.... 我知道單靠這些資料難以準確判斷,但都可否幫我分析一下?2)我有個奇怪的玄學問題..別怪我無知...假設自己失業,算命知道自己要半年後才有好運和找到工作,那麼是否頭幾個月找工作都是多餘,是否待至半年後才找工作都得?甚至更好?

鈞洋答:1)舉凡婚姻線有幾條之多嘅話、自然取最長嗰條作準,假三條都一樣長、咁就弊家伙囉!即係話瘦田冇人耕耕開有人爭,一世衰硬响三角關係。如你所講:第2條在中間以上的位置,很長,最長的一條,線伸出向上,差些長過尾指,趨勢向尾指和無名指的中間隙位伸延,跟住與其他線相連了,有點複雜,不知怎樣形容。不過這條線的線頭起點位置卻沒有1和3線般早…. 就以呢條論斷姻緣,若然紋理向掌外延伸、十居其九嫁出國。好似你描述咁,查實條婚姻線係始尾指和無名指的中間隙位而止於1和3線之間,明確顯示出個人比較理智看待愛情,但係因住理智得滯、分分鐘冇哂熱情,哈哈!2) 做人要好似孔老二所講:「君子自強不息」。你若然淨信算命佬說話、咁你就聽揸兜矣!凡事有因有緣再有果:(因為)你努力搵工(緣故),某公司留意到你嘅才幹(結果)聘用了你。

2082.我系張生,八字如下xxxxxxx,期待指點下命格由適合從商嗎?煩靖指點。

鈞洋答:太陰陷宮羅網守命,面對太陽化權而顯得優柔寡斷,香港人稱之:濕滯,大隻廣…. 至於八字辛金生四月而盤金水旺、屬於劫印化晉格用在月提、財通門戶,驟眼看似不錯,查實水火相沖火被沖起,一路復行水運而見財化水。除非遠離出生地,否則不宜從商。

2081.尊敬的吳鈞洋師傅你好:本人男性,姓名王X新,生於中國大陸正北方。想問大師虎年該注意那些事項,如有不順應該如何化解和今後的總體運成如何,如財運,事業等!求大師百忙中解答,萬分感謝。

鈞洋答:丁火日元生申月、壬甲透月時干,是官清印正格,入木火鄉利火燃上而通明,有燄之人必得名於社會。唯獨五行地支三刑逢沖,宜遠離出生地、走向南方才有好際遇。今年謀事工作會有變動要辛勞奔波,不利家宅人口、更刑妻子及家人,不論親疏整年因女人而受負累,自己也要小心泌尿腎經疾。

2080.師傅,您好。看到您的主頁上面使用語句很幽默,我也時常關註你的博客。我已經發過四次給您了,但是在博客上不見囬復,可能是我唔好彩,成日都抽唔中我,所以再試着發一封E-mail請師傅幫我看看。Sugar,女,現在廣州工作,想問一下我的事業跟姻緣。我幾時才可以在事業上有所進展?

鈞洋答:糖糖,你係江河水生子月,又寒又冷又結冰(哈哈!咁咪似冰糖?)八字地支水汪汪匯流入夫宮,因住瘦田冇人耕耕開有人爭、分分鐘糾纏於三角關係。今年廿七脫離剋夫運而轉入姻緣鄉,我認為好快會真洞房。由於命中靠月干丙火食糊,而現行癸水搞到天昏地暗,睇嚟非過32歲後事業難有好發圍。

2079.我叫小江,女, 1)今年36歲了,一直未婚,八字日柱為辛亥,聽說“金豬豈有郎”,是否意味我這輩子都嫁不出去?我還有可能嫁個條件不錯的老公嗎?2)此外,我留過學,就職過華爾街,對事業有較大期許。兩年前有幸得到你的回復,你說我的命運以36歲為界,之前一無所是,之後路路洞通。命理上說”寅申巳亥全,位重高顯“,我去年回國了,可還是事業平平,想問從八字上看,我今後在事業上還有沒有大的起色?

鈞洋答:辛金命生夏四月,金不弱唯獨怕被火熔。此刻必須用水調候、喜金生水,本來在歐美西方地域才有發展,回到祖國唯有靠祖宗風水蔭庇矣!1).你係昭君命,應該嫁往番邦才有運行、回到祖家不樂觀。幸虧你目前入金水用神運,論理今年秋天會有人識貨。2). ”寅申巳亥全,位重高顯“,但你寫漏了一句:「威鎮邊關」,即是出國遠離生地。不可不知你今年立冬後才轉運呀!

2078.我姓盧,女性,想向老師請教:1)本人嫁來日本後,覺得不太順利,特別在今年人際關係不太好,是否不合適住在日本,有沒有方法改善?2)2005年生了一女後,希望多生一個小朋友,可惜一直沒有。是否本人命中只得一個孩子?3)家庭錢財運如何?

鈞洋答:甲木生六月,五行燥過鬼,急用水調候。水係有呀,唯獨欠金生。1)唔係話和番唔好,只係覺得你去錯地方。事關東方屬木,西方屬金水,喜用金水而去東方自然美中不足啦!忍多兩三年喇,人際關係43歲後有改善,今年已經好好多囉!2).你以火睇子女,但五行缺火而水卻會局子女宮剋火,睇嚟生瘡容易生仔難。試下今年庚金劈木,睇下能否劈出火花在夏令?咁你無論如何要都把握時機努力做世界喎!3)43歲後財運大有改善,肯定小富以上。

2077.吳師父你好!我是萬莉,本人家大門在東北方每件事情都是悲觀想法小病小痛不在講我很擔心有情緒不穩呢!我已照師父所講放擺設好風水,想請問東北方再放什麼東西了却悲觀情緒呢?我條命會否離緍呢?

鈞洋答:萬莉,名字好聽呢,一本萬利嘛!整條命天剋也沖:卯酉沖、丁辛沖,加上目前丑運、更加丑未沖,再加上酉月辛金而五行缺水通關,我也很擔心你有情緒壓力症候群。你嘗試在東北放多隻豬仔吧!應該有幫助。

2076.本人Joy、女性,請問師父我今年是否會搬屋?

鈞洋答:今年行殺破狼,呢個月復行殺破狼,可能工作環境有變動卻未必驗搬屋。流年天梁化權入田宅、纏煞忌天刑,小心家人有意外就真!

2075.吳師傅你好,本人姓羅,連續兩次拍拖都俾人呃,好傷呀!(1)幾時至有真姻緣不再一拍就散呢?會離婚的嗎?(2)我想從事寫作/音樂的工作(副業性質),有機會嗎?幾時呢?(3)今年正職轉做跑生意的,有機會賺到大錢嗎?(4)點解我好多個男友都係屬馬?第時老公也是嗎?這個已經離合了三次,每次都傷得我很深,每次再一齊又會更傷,他的八字是否從兒格?

鈞洋答:點呃法呀?因為好懷疑你會畀人呃,嘻嘻!1)你係冬水傷官見官命,更加弊係乙木傷官而神經過敏,斷估今次係佢卦!事關你入火運至利姻緣,條仔命中啲火烈過沖天大火災,仲有假嘅!40歲後婚姻可望終老,更旺夫到白頭。2). 木火通明利寫作,都係要40歲後至出名。3)40歲前辰戌沖入夫宮而動土,點會唔勞頓奔波呀。4)你壬戌日柱、斗數夫宮紫微化科守午宮,前者八字午戌會火局化用神、後者紫微午垣御馬出征…. 睇怕第時個老公十居其九係戰馬。依家隻馬係用食神去制殺、而用神會聚响妻宮。

2074 我叫阿耀,是師傅的忠實讀者,這次是我第三次來電郵,希望有運能抽中我吧!請問:(1)我的命格是否適合做紀律部隊?(2)在2011年工作上會否晉陞?(3)我往後能買樓及積財嗎?(希望晚年安安樂樂!) (4)從我命盤看,我的兒子的命格如何?

鈞洋答:耀哥,睇嚟你條命做財主有運過當差。1).由於正月丁火、四柱火旺而金更旺,唯獨五行欠水、冇官冇殺,命以金看財、以水看官,既然財旺官衰、打政府工睇怕升極都有限度。2).2011多數會晉陞,流年也旺桃花添!3). 講嘢呀!話明係莊主、員外命,又點會冇樓收租呀!4)子女宮太陰天機化權守寅垣,太陽卻坐子宮,註定利女不利男,個仔要出外方能成材。

2073.本人姓吳、女性,想問:1)今年年初轉工,但感到很吃力,至今還未適應。我是否適合做呢份工,事業如何?2)我的健康運如何?3)我將來會有子女嗎?

 鈞洋答:癸水命生五月、全盤金弱水缺。條命財多身弱、未行入金水運之前自己必然被錢使、而唔係去使錢。1).今年你傷官配印,夏至過後一陰滋生,你應會適應環境、運程可望改善。2).五行缺水、內分泌腺體不正常,須注意婦科、生育……系統。3).肯定有、不過要34歲後。

 2072.本人姓張、男,之前曾請教過師傅。現有急事詢問:現身體出現心口不舒服、有時心跳加速,看了E生但查不出原因。問今後會否好返?年頭曾給朋友告說今年身體會出現毛病因寅午會火局,叫我小心身體。

鈞洋答:五行火炎土燥而日元癸水元神被蒸干洩盡,斗數:天同雙忌入疾厄。五行水被蒸干,疾厄太陰落陷、天同化忌…兩者俱屬水,疾病發生於泌尿、腎經、神經系統,咁鬼候生照計唔會纏慢性泌尿、腎系疾,睇嚟神經系統疾就明顯得多。以你五行結構,寅午會火局火炎必蒸干水,係陰虛肝火盛起病。

2071.羅X君,性別:女,婚姻狀況:新曆2010年1月29號離婚,現住廣東佛山市1)..本人離婚一無所有,如果有機會再婚,會幸福嗎?2).下半生孤獨好?還是找個伴侶好?

 鈞洋答:壬午日柱生亥月,四柱金水俱旺、急用火生土、用土制水,喜用會聚夫宮。1).高歌一無所有,成個無產階級鬥士,哈哈!依家行未運、會入夫宮化用神,應該响未來兩年有新結合。2).48歲後到老都唔錯,起碼財源廣進。

2070.本人姓林X梅、女性、香港出生。現與一名1957年也是香港出生的男士拍拖,這次算是我第3次的婚姻,由於他年紀比我小,不知是否合配或且還是要等其他的機會比較好呢?

鈞洋答:己酉日柱、甲辰月,天干甲己作合合而不化,地支酉丑會食傷入夫宮。一世人遇到男人,頂龍係做知己而不可以結婚,否則一結必分離。50-60歲己酉運、夫星犯伏吟,冇婚姻猶是可、有親必大鑊! 

2069.本人Elly,女命、想請問一下今年有機會轉份好工及是否順利呢?還有財運又怎樣呢?

鈞洋答:戊申日柱生九月,本身地支已經三刑逢沖,現運月堤戌未相刑,咁啱今年庚寅更加天剋地沖、沖完再沖。轉工係意料中事,但未必轉咗就可以安定、講唔定新工籮友都未坐熱又話要再郁過。財運更加唔睇好,事關今年太歲又沖入夫宮、仲係好惡嗰隻,若然婚姻不受影響則因住老公及家人有意外。

2068.本人姓關,生於香港,是女姓,本人於1996年結婚,現育有一子,今年10歲。現想問,丈夫及兒子之健康及本人之事業及運程,何時有大運?望能解答,謝謝!

鈞洋答:乙木生未月,木旺極唯獨水虛金弱,須知道乙木主神經若過旺就會傾向神經質,唔夠水生就會衰弱同埋有病產生。你靚在夫宮坐丑金水流通,依家都老都旺倒你官人同個仔,老公健康有事係血液,個仔則容易遺傳你嘅病。你以從事操作性持工具利器謀事方有好際遇,否則須入金融業或供職西方機構。今年運唔差,同老公都有幾好。可能轉工或有所兼顧,至於子姪包括個仔小病多。

2067.本人姓蔡、女性,現一直沒有男朋友,想請問何時才有姻緣到?如果以後結婚,婚姻會美滿嗎?財運會如何?

鈞洋答:你條命屬木,天干透庚劈三個木。跟住地支全盤朋沖,成條命五行好似有仇咁,由天宮打到落地府。斗數機梁守命纏天壽,會照機月同梁,太陽巨門而太陽化忌入夫宮,廉破祿權守交友。靚女,你條係比武招親命,但唔係男人為爭你而鬥噃!相反卻係你要沖鋒陷陣至奪得「美男」歸嗰隻,去西方鬼域至覓得真愛。將來婚姻唔太差,但老公要大你10年以上或相對細2年左右,對眼有輕微舊患或鬥雞,陽巨守夫宮而太陽化忌、驚住「陽巨」也有啲唔正常。一世財運好好,仲有遺產來自娘家或夫家而承受。

2066.我叫Ta,女性,住香港。我之前欠了出生時間,現在再補上,希望這次可以有幸讓你抽到。我一直希望可以早些結婚,怎知等待了這麼多年,很難過。現在在網上認識了一個雙斷掌的台灣男性,他是1977年出生的,已經見了面,家長也見了一方。我不肯定我們是否真的有緣。我對自己的前途也迷茫,繼續留港工作、進修,或到台灣發展。我是當教師的,希望暑假後可以轉職業或離開香港,不知是否應該堅持,求師傅指點。

鈞洋答:結婚嘅嘢,你估話想結就天造地設咁嚟咩!不過以你乙木命來說,今年真命天子出現嘅機會奇高,仲有係你未來運也主出外,出外先有好際遇,理論上34歲係你命運轉捩照點,之前一舊雲,之後必超群。

 2065.本人Amy、女、想問兒子和女兒的八字。女兒的八字有朋友說她是'「官殺混雜」,也有人說是'「傷官見官」這兩命格都好像不太好的。而兒子的八字是「傷官佩印喜生財」忌水運,但他在34-63歲壯年期是行水運,請問 (1)他們的命格是那類?喜忌是什麼?(2)他們的運程如何?(事業財富健康) (3)婚姻家庭又如何?

 鈞洋答:1)個仔丙午日柱生午月全局火土,欠水缺金,成「羊刃格」用水喜金。個女乙木生庚寅月再見辛金算係「官殺混雜」格,青少年用水洩金生木作通關,中年後入金運、移步換形乙庚合化金而旺夫利事業。2).個女係專業成材格,去西方名成利就,34歲前利學業。個仔利財經機構,一世有運行,更加迫切移居西方。3).個仔紫貪命而一世風流,唯獨七殺守妻宮卻畏妻,名副其實又怕老婆又難滾嗰類。個女擺明官殺混雜、三角關係極明顯,叻女!一世唔想被婚姻束縛,寧負天下麻甩佬而不想畀麻甩佬負!

2064余阿文、女、生於芝加哥,現在在波士頓半工讀,六月尾畢業。請問事業在那,姻缘何時何地?老公相貌職業?謝謝指点迷津

 鈞洋答:丙火太陽生辰月時干透癸,成條傷官命,叻女但獨立非常。由於佢條命以水睇老公、單丁一點雨露癸透時干而五行缺金生,必須响白虎金旺地域先至有姻緣,所以美國係首選,而鬼佬係特定。老公係專業人士,深近視開口夾着脷之流,既然條命以水睇老公、你話太陽見雨露會點!

2063.我叫阿瑩、女、福建出世,1)我覺得近來男友对我好冷淡,我倆是否有第三者?會分手嗎?2)我今年想買樓,問今年買樓利我嗎?會否是我的姑婆屋?

鈞洋答:1)去年開始了,還在一起嗎?事關你癸未日柱、正好是2003年哪年太歲干支,去年己未、天剋地沖,必然影響婚姻愛情,否則人口刑剋。2).明年有機會復合或結識一個新朋友、可能年齡比你少。應該唔係姑婆屋。

2062.本人姓莊、 女,香港出生。好耐冇拖拍啦,好驚呀!1)現同一男子交往中,,想知夾唔夾,及長唔長久2)我同細過我既男仔發展得唔得?大過我好多呢?3)我要等到幾時先會拍拖及結婚,婚姻運如何,我係咪尅(老公)命?有冇兒女?現時失業,請問何時可找到工作? 

鈞洋答:你有冇聽過韓湘子呀?八仙過海會吹簫嗰個靚仔呢!佢雖然靚仔卻一世溝唔倒女,咪話娶老婆喇!事關佢係「寒傷仔」,庶無溫暖,鬼吼!1).你都係呀,戊戌一柱生冬天,全盤冰封一片,寒過「寒傷仔」,亦係要經歷坎坷才有結果!依家嗰個?幾好都好2012年全局沖齊自然散、喊都無謂。2).陰陽羅網廟旺對沖,註定一世同男人撈亂骨頭, 2014年保證有姻緣,理論上對象應該大你好多。3). 你係畀老公剋嘅命。至少有一個仔,2011年工作先至安定。 

2061.本人浩文、 男、   香港出世,今年11月將會結婚, 我和太太幾時會有bb呢? 

 鈞洋答:夏水干涸、喜金用水,唯獨 五行有金卻欠水、偏偏條命卻以水看子,未來求或許勉強可以,唉!有啫啫嘅咪期望太高。 

2060.我妻子名叫X莉,西曆1973年X月XX日下午2-3點出生,現在幼稚園擔任保育員,工作辛苦,另外人際關係也較複雜,她一直想調動工作,我們兩人也多有爭吵,今年西曆三月她身體不好,剛做了手術,現在在家堨蟛i,想問下是否適合調動工作?會對家庭有什麼影響?若調動的話要注意些哪些問題?大概什麼時候能有好的結果? 

鈞洋答:2010年清明過後、即係現在應該有調動甚至轉工。我唔多明白係你哋嗌乜交呢?你咪好想佢調動咩?由於你太座日柱庚寅而月柱庚申,今年日柱既犯伏吟而五行亦沖到七彩,整個虎年多動多變係意料中事,仲有係小心夫妻間之老人家有意外。 

2059.我叫Rachel C.是女生,在美國留學工作幾年後,去年回到北京工作。今年35歲,一直單身,想知道什麼時候能遇上真命天子?夫婿如何?事業上會有大發展嗎? 

 鈞洋答:還35歲?37矣!32歲前丙寅運大好機會你為何不結婚呢?哪時,以你辛亥日柱行丙寅運而天合地合,正是締結良緣好時機!現在機會不是沒有,而是要出塞和番嫁老外(持外國護照都可以),由於你命屬弱金生夏令而喜用金水,嫁老外勝過嫁同胞。37歲入今年之後,保證你好運行至82歲。問夫婚、你有沒有聽過「貼錯門神」?就是貌合神離的意思,還有是對方多數離過婚。 

 2058.本人芳芳、女、台北出生,請問老師;本人是否將來可自行創業,性質為何?房地產適合嗎?感情始終沒有遇見合適的交往對象,正緣何時出現?以前曾有老師說過;婚後容易刑剋另一半因夫妻宮為天同化忌、是否為真? 

       鈞洋答:太陽化祿守亥垣,是反背格局,將來肯定冒出頭創業以名成利就,大利離鄉別井。由於癸水生酉月而全盤是金水,唯獨夫宮坐巳火,格局列入「劫印化晉格-火地晉」以夫宮巳火內藏火土為喜用。29歲後到老一路行火木運,正是姻緣締結佳期和創業大運。喜用火土自然利房地產行業。丈夫豐滿之人,小心心血菅和腎系病皆因夫宮天同化忌,幸而有地劫同宮劫忌星可以大事化少,惟不幸尚有擎羊同度手術難免,70歲後才剋夫,算刑剋嗎? 

2057.我們向來不害人,現在反給人害。我家住居屋,是門對門的一種, 相距只有六尺左右, 最近對家加了一道反光鏡鐵門,好似一面鏡子照向我家。他們一安了這面鏡子不久、我的丈夫就失業了。相信這面鏡子我家一定有傷害,現在不知怎麼辦,心中好怕,更不明白為什麼要害我們,請指導如面對? 杜太 

鈞洋答:你可以寫一幅對聯:「祥光普照門當戶對,福氣洋溢形附影隨」對住佢面貼在大門上咪得囉,使乜咁驚青喎! 

2056.本人姓虞、女、生於芝加哥,庚寅2010 June畢業於波士顿. 請問吳先生: 事業前程,會在何處姻緣時間何處?謝!網上見 

鈞洋答:霸王別姫、靚女虞姫個姓氏,我個姓亦畀你哋頂帽封住……哈哈!唔講邊有得笑?條命丙火生清明三月,不弱唯獨土太旺、係火土傷官格,必須見金水「財官」先至有運行。也好彩生在白虎金水旺地,若然響東南亞面世嘅話認真唔恭喜。一生發圍、包括婚姻斷離唔開西方歐美世界,更樂見終身俱行金水運,即係一世有運行,靚女,略嫌情緒化、也懶懶哋,哈哈! 

2055.小女名Kitkat,冇brothers or sisters,現在英國南部讀書。請教師傅我未來的運程,事業如何?將來可以自己賺取生活費(養自己+父母)、可在外地發展嗎?父母的健康好唔好?  

鈞洋答:殺破狼命,五行戊土日元生二月而全盤金水,更行水運,再響世界之正北讀書……真箇水汪汪、啲水仲犀利過廣東省第一書記汪洋。唔怪得brothers or sisters有都畀無情水沖走哂喇!當你「從財格、亦即從水格」算命。一世都要向白虎玄武地走「歐、美」,明年開始進入金水好運,莫講賺取生活費,就係生乜生物費……都綽綽有餘。唯獨條斷唔近得阿媽,一近必有難!另外嫁個老公一定要操刀揾食,否則必刑剋! 

2054.本人性:孫、姓別: 男、出生地:香港,本身從事會計性質工作,請問運程?有朋友想和我合資做生意,適合嗎?及姻緣運如何? 

鈞洋答:春土不寒、即係有火喇,仲好旺添!略嫌水妻宮而五行缺金,明顯一潭死水,唯獨全局以水睇:錢銀女人……既欠金生水而水涸、就算搞得成生意也肯定周轉困難。目前行庚金運,真洞房之機會好大,至於從商怕要等52歲後嘅申酉戌西方運先至有發圍。  

2053.我叫呀Sa、女、香港出生,想問: 1)姻緣,有個男仔上年年尾開始追我,佢似家好似又唔多睬我咁。佢想點?幾時有真姻緣,會唔會嫁唔出架?2)事業,幾時揾到工?失業好耐。

鈞洋答:你條命正宗係「八両金」而重重被土困,加上依家又行燥土運,真係唔知點答你好!1). 因為個名叫阿Sa,今年好難有婚嫁。更由於五行中意金水,除非有決心做「番邦婆」否則幾嫁得出!2).今年金旺木厚,唔會失業囉!秋後事業會較穩定。 

2052.我叫小江,女,今年36歲了,一直未婚,八字日柱為辛亥,聽說金豬豈有郎,是否意味我這輩子都嫁不出去?我還有可能嫁個條件不錯的老公嗎? 

鈞洋答:時干丙火合辛金,地支寅申巳亥齊,37歲運入水鄉用神運事業愛情將會一起來。唯獨是,命 格註定離鄉別井,回到國內肯定一無是處,聽過:色即空、空即是色…. 嘛?首飾之金講求「成色」,於西方有色,入東方色空。如何嫁得出! 

 2051.本人姓梁,已婚,想問丈夫運程。唔知佢幾時可以發達?有無機會做官掌權?同埋一生中咩時候運程比較好,咩時候有災呢?佢在廣西北海市出世。多謝吳師傅! 

鈞洋答:己土生十二月,五行多乙木卻欠火缺金,必須行金運才掌權、入火鄉先有機會做官。問幾時?37歲後掌權,52歲後當官。佢未做得成官前你先做!係做「梁門光祿寺卿」,掌菅梁家之大權。42歲前有災,只不過災在於你因住丟官炒魷而發生婚變。  

諮詢及留言