|
答讀者問(2101-2150) (由於本網站廣受歡迎，國內外讀者電郵問事與日俱增。而我答覆來件務必親自作答，絕不假手於人！同時只限於在網上列出，不設個別私下回覆。但因問事電郵實在太多，實在無法一一解答，由即日開始，將會採抽簽形式解答。情非得已，謹此向向隅者致以深切抱歉！
文.吳鈞洋 2160.請問而家呢個時代，撈偏既行業或職業有幾多？可否講至少15項黎聽……其實係咪收入唔穩定既工作就算係撈偏？點為之撈偏？同埋點樣既八字看出係適合撈偏？
THX 鈞洋答：律師（訟棍），醫護、髮型師、廚師……（利器搵食）、相士（術士）大師（神棍）、金融（賭棍）、軍警（武職）。以上係較體面嘅半偏行業。屠夫、三行、黑幫、賊匪、性業、馬伕、大檔、小販……屬於正宗撈偏。泛義指：持工具、利器以謀生，違法或走法律罅之行業均屬偏門。官多殺旺、五行戰局多屬偏鋒命。 2159.吳先生你好！本人姓林，女，在香港出生。在2009年頭結婚，希望在2011至2012年懷孕，有機會嗎？如有幸懷孕,
會是男或女?孩子健康嗎？ 鈞洋答：你命中五行金寒水泠，行到30歲嘅運都係金寒水冷，須知孤陰不生獨陽不長，女人五行寒親大多數排卵不暢順、子宮更不能容納胚胎。最弊家伙係命中天機化忌午垣守子女、仲多咗隻羊添！好彩前行緊半火局運程、咁啱今年又會齊火局，睇下今年有冇機會中招啦！相比之下較睇好今年。 2158.吳師傅您好！本人Philip，生於香港，已婚。請問本身八字強弱、喜用神是甚麽？以後運程如何？現從事電腦行業，適宜創業做生意嗎？如適宜，何類型比較有利呢？
鈞洋答：火炎土燥身強極，以金水為喜用神，一路火木忌神運，睇落幾辛苦。電腦行業都啱嘅，之不過出外方有利及有發圍，首選係歐美加，去唔到上大陸北方也有改善。另外，可以做金水行業生意。 2157.師傅，你好，本人姓劉，乳名寶，男性，香港出生，想問事業及自身，謝謝! 鈞洋答：疾風勁草逢霜雪，打你幾硬淨都惡頂！機月同梁命，天梁守午垣、除非出外發展喇！否則60歲後先至有運行。 2156.我叫阿秋，女，生於香港。明年大學畢業，適合從事什麼行業？另外，感情方面，何時真姻緣會來臨？另一半會係咩人？感情路上會波折重重嗎？ 鈞洋答：財官印三奇格，命有三多：讀書多、銀紙多、仲有阿媽多……講錯，係阿媽嗰邊人口多。適宜金融機構任職，可以陞至管理階層。另一半會係中國人，一世人洞房生仔兼搲銀……冇乜波折更少漣漪，算得上福壽命。
2155.尊敬的吳鈞洋師傅你好：本人男性，姓王，目前未婚，想請問何時才能結婚，未來妻子或者真命天女何時出現或者現在已經出現了嗎？未來妻子個性、外貌如何？我的孩子什麽時候會出生呢？
鈞洋答：未婚，目前末婚，兩者有好大分別噃，哥哥！前者斬鐵截釘表白乜叉都冇、但後者卻扭扭擰擰……而好鬼曖昧，莫非今年末結婚？哈哈！講笑咋！你妻宮入羅網守辰垣，十居其九外族人或揸外地護照，一世奔波好動甚至無事忙。外貌？咪眼大大白白淨……幾靚女嘅。至於個性呢一層，由於佢為人率直唔識隱藏，睇怕幾惡頂！28歲嗰拾年乜都搞掂。 2154.您好鈞洋老師，我是JJ,
女性，請指教：我在2010年2月認識一男生,
外國人來的，我跟他有沒有夫妻緣？我快40歲了，為什麼姻緣那麼差。會有好轉的機會嗎？我是否不會結婚的？ 鈞洋答：問姻緣？唔過39唔使旨意嫁得出，之前就算倖僥有得洞房（不是煮飯仔嗰種）你都喊得一句句，問因由？皆因夫妻宮三刑逢沖是也。今年春分後七日轉運，所以有料到而（撞鬼）。再問原因？事關你夫宮太陽陷子而正一「陽巨跌咗落子宮冇厘火氣」。若然不嫁出國和番的話，呢世人睇怕紅魚青罄而終老。 2153.本人姓陳、 女生、香港人。請問我是否會孤獨終老?
事業及財運如何？ 鈞洋答：戊土坐刃而生辰月、欠金缺水。由於五行全火土密哂龍，換作己土而成「稼穡」靚到絕頂，奈何戊土只能列作從旺格。事業財運唔差喎，唯獨姻緣卻喊都無謂！事關土視木為夫星，既缺水、年輕嫁得出個老公亦恰似白蟮上沙灘，到咗目前庚金運更加不幸，庚金即大刀、玩玩下一個唔覺意而手起刀落……認真牙煙！ 2152.胡小姐、女、請問此人帶夫星、子星、財星？命局如何？她跟徐先生的合婚如何？ 鈞洋答：胡小姐的命局必須離鄉別井，否則難有好姻緣，當然去歐美國家最佳，大西北地區也適宜。嫁夫年齡宜長十年以上，眼或血有缺陷。命中有女恐無子，縱有亦緣分極薄。基本上她和徐先生的命算得上配合，只是在本地婚姻難完美大前題之下，合婚好壞要看環境斟酌矣！ 2151.本人姓謝、女性，結婚多年未生育。是不是生辰有八字問題，命中有沒有子女呢？
鈞洋答：己土命、本來最利孕育，奈何五行缺水欠金，干爭爭咁……生瘡容易生仔就困難！除非移民歐美，若然個老公係鬼更有幫助。 2150.請問她壽命還有多長?
她之前10年幾來, 平均每隔數年便患一次大病 (癌症),
共患了4次, 其中一次是良性, 其餘是惡性瘤,
對上一次患病已是2007年的事了……欲知她以後健康如何，尤其想知她還可生存多久?
另外請問, 她與丈夫和子女緣份如何? FROM:美麗 鈞洋答：阿靚你好！你問病嗰位姐姐、好敬佩佢嘅鬥志，更希望有奇蹟出現在她身上。壬水生辰月，五行表面水源充沛查實極易水涸塘干。目前行入丙戌之戌忌神運、先沖月堤，月堤既沖則寅申復沖，到咗2013癸巳更加沖入時支亥水引發朋冲，呢年過得倒亦牙煙！ 2149.你好！希望今次會抽中。本人極擔心2名子女的前程大女天生聰明.但喜歡hea.
兒子有讀寫障礙，好努力但無成績，好煩。順便睇埋我是否短命相，因為我湊佢地湊到想死。你的FANS:
梁太上 鈞洋答：你條命火炎土燥用金水，依家行金水行到老、點會短命呢！個女條命天相對武破，夫宮紫貪，福德七殺廉貞化忌……整定出外成材，讀書固然去番幫，好大機會搵個鬼仔畀你做女婿，勝在一世財源旺、唯獨左來右去宜置業以聚財。個仔五行乙木過旺而燥洞涸，用水喜金、大利歐美生活，由於傾向神經質而欠靈活，宜國際學校教育。 2148.大師，您好！本人Angel、女生、生於台北。請教老師，本人已年30卻未遇見合適對象，自認自己有大女人心態，是否因為如此沒好對象出現呢？明年兔年有機會嗎？對象應比自己年長或年幼較合適？兔年整體運勢如何？ 鈞洋答：非也！相反，就是因為你有大女人心態，最終才穫取好獵物。癸巳日柱而五行金寒水冷，用神在夫宮火土、調候兼制水。奈何24歲後入壬午運，28歲前壬運群劫爭財剋火怎有好姻緣！今年庚寅時支會火局化用，很大機會遇上真命天子。兔年整體事業運不差，但是不利女性人口，容易刑剋血光、包括自己在內，也不排除發生男女粉爭甚至三角關係。 2147.本人名靜波、男士、香港出生，感情及事業皆不如意，想請教師傅，真正姻緣何時才出現，大概什麼年份？這幾年的事業也非常不順，什麼時候才會有機會做出成績來？ 鈞洋答：風平浪靜、波濤不驚……點會好噃！咳哈哈！講笑咋！丙火生午月，四柱全火土，只係時支丑宮內藏金水為喜用。五行金妻水子， 45歲前玩煮飯仔就得、搞真拜堂就唔容易。45歲之後入水鄉旺運才是人生轉捩點，之前話你順嗰個、不過因為收咗你錢而不敢講真話罷了！ 2146.我叫芬女，自從2002年9月被炒後我的工作運甚差﹗絶大部分時間失業，2006年找到工(以為很高興)但同時母親卻患上惡疾(2009年已逝)﹗今年6月尾因得罪小人被炒……現找工作……求職石沉大海。我覺得29歲至今運程很差，心情又差，是否我這十年運特別壞呢？
我何時才見到曙光？ 鈞洋答：丁丑日柱，干透壬癸水化忌，五行官殺混雜，41歲前行水運30載，丁火被壬癸水；一時滔天大浪、一時煙雨濛濛，係就係你個名叫法，不過係昏女而非芬女呢！你都知呢十年運特別壞咧！點都要挨到41歲才見曙光，仲有係，如果可以嘅話、離鄉別井有咁遠去咁遠更加好。 2145.本人姓史、英国出生，男性，现有一女友，未來老婆會是邊到人？ 請問感情及事業？謝謝 鈞洋答：天梁守午垣會照妻宮陽巨落陷入子宮，話之你係「竹昇」，只要擁有烏卒卒頭髮和烏溜溜眼睛嘅男人、點都要娶隻金絲貓才有幸福。天梁守命加上五行木火通明，一世衣食無憂。唯獨真正發圍運要待54歲後到老。 2144.吳師父：你好，來信多次未被抽中,
希望今次會被抽中本人。我是Zoe、女性、本港出生，出生後至今孤獨一人，都未有人喜歡過，好驚是孤獨終老。請問：(1)我是孤獨命嗎？(2)如不是，何時會有真姻緣？對象大概會是一個怎樣的人呢？
(3)會有異地姻緣嗎？(4)多年來事業都是平平，有升職發達置業機會嗎？ 鈞洋答：唔係嘛！出生後至今孤獨一人？咁你屋企人去哂邊？1).孤獨命？點似呀，夫宮太陽太陰守丑垣，即係話將來丈夫女朋友眾多唔愁寂寞。2).你係甲己化合命，28歲後才有姻緣，隻公係專業人仕、年紀大你好多，有米、大鼻、大細眼，人風流甚至咸濕。3).可能，因為桃花星纏遷移宮。4).等今年過後，2011年桃花入命，有料到。 2143.小妹姓梅、是香港人，麻煩師傅幫小妹解愁解困。因為小妹已經廿八歲，都只係喺廿二歲嗰陣拍得一次拖，仲係做人哋婚外情第三者嗰隻，最終搞到心力交瘁。請問：1)我的喜用神是火土還是木？ 2)我想再轉行做網頁設計，服裝或形象設計,
請問是否合適？ 3)請問我的姻緣幾時會到？4)我適唔適宜生仔，好担心身體唔係咁好，但又好想有小朋友5)我適唔適合投資或自顧？
鈞洋答：梅花係國花，屹立寒冬傲雪欺霜，你姓梅、或許個姓並不代表甚麼，但提到個梅字我都肅然起敬。你係乙木花卉命地支坐酉而生子月、全盤係水….
唉！真係冇投錯胎，直頭命如其姓。好彩時辰透出個陽光丙火，簡直係老毛個媽咪，第日生出仔、多數東方紅太陽升。1).喜用神木火。2).可以。3).2013年之前。4).
旺過豬乸，担心身體唔係咁好喎！5).將來條命四圍走、冇時停，好似家族生意。 2142.本人姓張，女性，想問問師傅我幾時會有bb，我有冇子女宮呢？ 鈞洋答：靚女，你問得真出奇，有冇子女宮喎、即係問人自己有冇子宮….. 點答你呀？命屬戊土，五行火炎土燥成坐火炎山咁、欠金缺水，既不宜耕種、也不容開礦，一路行火木運到六十歲才轉水鄉，除非移民番幫嫁鬼、又或者揾個老公寒過寒湘子而星火全欠，否則生瘡容易生b難囉！ 2141.本人劉小姐，最近因發現先生有第三者，但先生話已與其分開，並且求我原諒。本人至今實在不能原諒他，不知應否選擇離婚！ 2140.本人Kathy，生于中國南方系澳洲讀緊書準備畢業，麻煩師傅幫小女撥開愁雲：1)會計專業就快畢業未知可唔可以系澳洲穩到工留系澳洲工作發展？小女適合翻中國定系移民澳洲發展比較適合呢？2)女仔大事莫過於感情婚姻，身邊還未出現適合男仔處於空窗期，請問姻緣什麽時候到，幾時有機會結婚生子啊？（怕自己太揀擇好驚嫁唔出啊）個老公系點樣噶？3）父母健康如何？
多謝師傅！ 鈞洋答：壬水生冬令地支會水局拱北方、啲水犀利過中國兩代領袖「翻江起濤」更加蓋過廣東第一「汪老洋」。總之，乜鬼都畀你沖乾沖淨、若然一日唔出國、斷估你老豆老母都冇啖好食，揼心揼肺！1). 你五行單一丙火透月干調候、唯獨滔天巨浪係咁沖，真險過剃頭。火旺南半球，澳洲為最！若然返祖國斷定你冇運行。2). 個老公幾叻，有多少權威、但多數福氣型嗰類，27歲後至可以辦理洞房手續，我認為2013年機會好大。3).
因為你斗數太陽陷宮化忌，好彩一早較腳先，否則老豆嗰邊認真多得你唔少，2012年剋父系人口，不知是誰！ 2139.師父好人：我叫麟，女，生於廣西南寧市，離婚有一女。他，生於北京，離異無小孩。現他已從北京來南寧工作，我們倆能否成婚、有小孩？並請簡單分析下我的運程。 鈞洋答：幸虧讓我看到「師傅好人」四個字，否則你今趟不會挨鞭子（被抽中！），信嗎？哈哈哈！你命中丙火太陽烈日中天炎烈異常，少些水也不能舒解酷熱、有水也宜得來源而見金坐水、否則易被涸燥天氣蒸干。41歲入金鄉，會子女宮化用神，我認為2012年壬辰最利生育。他屬弱金而五行木旺，第一喜歡用金強身伐木。45歲入金鄉而興旺廿年，我認為今年秋後、亦即目前得子機會奇高。既然如此，當然不要錯過做人機會，今年最宜頻密嘿咻，而早午晚炒飯……必有所獲，哈哈哈！ 2138.致大師，kennis女性、請不要公開我的時晨。1)想問何時有姻緣和結婚？2)可否嫁有錢老公？3)用神是什麼？ 鈞洋答：1).啱啱依家行入結婚運，如果嫁出國或者可以結成婚，在本地頂龍玩煮飯仔咋！2)太陽太陰守夫宮響丑垣，陽氣慘被側邊太陰吸干啜淨而精毁人亡，就算嫁有錢老公你都係新寡文君個欵，冇乜着數更冇得過癮！3)地支四沖而用水通關為先，咁沖法難有安定日子過。 2137. 本人Emily，想問幾時有真姻緣？會唔會獨身到老？如果唔會、對方會是一個什麼的人(外型/工作/性格)？ 鈞洋答：鬼咩！太陽太陰未垣守命，女嗰個肯定畀男嘅糟質，响愛情方面、呢世人註定做亞軍（就係做咗阿一都會燉番落嚟！）天同化祿入夫宮夾空劫、擺明二世祖（也可以美其名謂之：有品味之人 ），有藝術氣質識享受亦好逸，肥嘜嘜，唔使做啩！哈哈哈……。 2136.朋友介紹、說你算命分析獨到，所以想找你幫忙看看。本人Kenneth，男性，姓周，想問婚姻、健康、子女及財運？請問有冇好運行？e
幾年同家人關係麻麻..事業又麻麻..好煩……請幫忙指點…… 鈞洋答：你個英文名係咪讀「啃泥乎」？啃泥即係食泥，咩嘢至食泥呢？哈哈！唔好以為整蠱你呀，哥仔！事關你條命日柱丁酉生酉月，土多生金而化忌、財多身弱命，一生冇絕路唯獨半世為財勞（畀錢銀女人累！）。講明畀錢銀女人累，呢世人幾難唔受女人氣、老婆一樣，唯獨將來享到仔女福。未來十年都幾辛苦，明年仲會轉工及剋屋企人。 2135.本人姓黃，出生資料如下.
有一男友已同居16年 (感情不好)
。我於2006年認識一國內男士互生情愫,但此國內男士巳有未婚妻，至今未斷關係，我十分愛他、卻不敢大膽表白爭取。請問本人與此國內男士是否有夫婦緣，望大師指點。 鈞洋答：庚子日柱生子月，係如假包換傷官格，話明傷官自然去傷個官人！咁都唔止，仲坐响你下低夫宮去「傷」同你有親蜜關係嘅男人添，真該煨！屋漏再逢連夜雨，你目前行緊嘅辰運更如會入夫宮成水局，加上明年子卯相刑，只可以同佢保持現狀，否則2012年水旺沖天、兩件都散硬。
2134.本人VIVIAN，已婚，之前大師批我先生話他要有“火”才能發，請問距系米“金神”呢？錦系米忌金水？睇我老公家陣大運二十年都行金水，有火都只能夠等流年，那他豈不是二十年無出頭之日？太悲慘啦∼大師有咩辦法啊？還有，我可以助距嗎？
鈞洋答：你老公五行係冬泥，如果冇光陽溫暖而再見金水運的話，咁就會冰封一片又或泥石流釀災…..佢當然唔係金神喇！只不過由依家開始行廿年金水運，乜叉都沖走哂，希望你多多保重咪被沖走埋添！你自己全盤係金、金神太旺、也是泥菩薩過江而自身難保，點幫呀！咁又唔講得話冇出頭嘅，事關冇出頭就明顯變成死龜，你老公有發圍之不過廿年內都要挨而矣！ 2133.本人姓蔡，男性，出生地香港，欲知事業，財運，家庭和婚姻想向老師請教：1.事業應向哪個方向發展？出外還是留港？何時應退下來？2.日前賺錢能力一般嗎？3.適合結婚嗎？ 鈞洋答：春土木壯旺，五行喜火用土、殺印相生格，甲木丙火俱透天干、算得上用神有力。斗數機月同梁，人雖然濕滯少少但到底世界仔。1).27歲後入火鄉開始有運行、唔排除仲進修，去邊戍都一樣而冇乜限。老豆真係大把呀？咁快就想退下來，哈哈！2).
今年27歲喇！疊祿入寅垣財帛巨日守，搵錢能力應該越來越強，若然唔係家族生意肯定受外族人賞識。3).
如果27歲前有行開嘅、依家可以拉埋天窗真洞房，事關未來幾年個老婆陸續會痾人仔……。 2132.我們想從廚房走一條水管穿過客廳的地板下到陽臺接個水龍頭(因為陽臺沒有水龍頭，沒辦法做水柱)
，還要從客廳的茶几位置做一個下水口，將倒掉的茶水引到廚房的下水管，這樣在客廳地板下面穿兩條水管會不會影響風水佈局呢?唔該曬!
鈞洋答：唔好意思，答得你問題時、斷估乜都造好矣！本來響屋企地板下製造新磁場、你話冇影響就假！唯獨專業玄學者（哈哈！係玄學者先至識，玄學家懂個屁，做騷就叻……）佢哋會用廿四山向飛星方法度出你居所嘅正確坐向，然後採用玄武佈局指點你在哪個方位放水喉通以益新磁場運作。 2131.本人Lily, 女生、香港人。1)本人已失業多時，想問問何時找到工作，又能否找到合意的工作？ 2)本人整體事業運如何。
又適合到外地發展嗎？3) 有一男友在2008年分手，去年嘗試找我數次，但因傷得太深沒有作任何回應，問他是否真命天子？ 如他不是，我的真命天子何時出現和為人如何？ 鈞洋答：壬子日柱火、土、金（財官印）併透，略嫌玄武太勁、水浸眼眉又寒又濕。1) 今年金寒水冷，9、11兩個月事業運先至略好、或許返工機會睇高一線。2)依家行緊太陽運，太陽照遠不照近所以大利出外發展，否則也會到處跑切灼咁轉，好似出年肯定變得交關。3) 八字五行水汪汪而劫重過鬼，明瘦田冇人耕耕開有人爭、三角關係極明顯。斗數太陽守福德而巨門守夫宮，須知陽巨主外族，即係話你要揾外族陽具嘅男人做老公先至有幸福，照睇揸外國護照都算合格卦！理論上80年嗰個哥哥五行都幾夾你，之不過佢依家行緊天剋地沖運、註定畀做愛傷的男人。而你呢兩年卻要真洞房，唔識睇！ 2130.Grace、香港出生、女性，近年來精神一直唔好。失業2年多了，而且一直沒有因緣，事事不順、人緣又唔好，真的感到好孤獨。請問：1)我什麼時候才會轉好運可以找到工作？事事能順利點呢？2)我是否一生都會沒因緣要孤獨終老？如果係,有沒有什麼方法改善？ 鈞洋答：雨露寒水生正月，一片春寒峭寥、百里無溫暖。本來寒過韓湘子，哈！卻妙在月干透丙火而財通門戶。你話近年來精神一直唔好，如果你冇吹BB作大目前處境嘅話，咁環境之下精神仲會好 嘅、肯定不是人。1)
你解放了，毛澤東揾到你了！41歲開始你轉入咗午火運，會入月提而財源廣進，啲蚊ni點嚟真係考起，總之你依家正步入好運，毛澤東拯救你！主耶穌打救你！2)
有錢點會孤獨呀？用銀両擲死啲男人……哈哈！更何况你紫貪守命成個桃花女咁（唔係茶花女呀！）明年更行值桃花，我認為有「情」到喇！ 2129.本人姓梁，兒子在英國出生，想問我應該要將他八字轉成香港時間嗎？另外我搞唔清佢係戌時定係亥時出世，因當時當地係夏令時間，不知是否要把時間減一小時？本人想知他的喜忌用神及性格取向，應該要向邊一方面栽培他讓他能發揮所長，他有書緣嗎？孝順嗎？ 鈞洋答：係咪因為吳鈞洋響香港、所以要將乖仔八字轉成香港時間呢？多謝睇得起，哈哈哈！我係笑……但唔知笑邊個好！1).有聽過「一物一太極」嘛？意指每一件容器佢都有自己八個方位。每一個地方，除咗有獨立（太極）之八個方位外，還有地方嘅四季、晝夜、時間……等等。2). 講到明係夏令時間，自然係將正確時間較快一小時啦！用番正確時間咪得囉！使乜頭痛啫。3). 個仔係辛金命，五行會東方而木壯極，好彩命中金一啲都唔弱，能集中金力去劈木，命以木睇老豆、老婆、錢財……等等。份人有義氣、懂得利用人際關係求財，中年行金運富有到老。家庭中旺男不利女，剋阿媽。宜從事專業技術或財經工作。 2128.本人姓張，女性，生於香港。1.)與未婚夫將會10月結婚，請問我倆會夫妻和順嗎？2.)未婚夫從事飲食做老闆，而我就自僱做零售，都合適嗎？3.)小女未來運程如何？ 鈞洋答：你丁丑日柱五行土旺過乜，即係傷官重而叻過龍（以前啲麻甩佬話：女人唔過六十都唔好畀佢食飽、就係指你咁嘅命，哈哈！）但老公五行金強極，亦唔係好相與嗰類。1).乜叫和順、死忍乎？睇落幾難喇！最好乜都一人讓一步咁就天下太平。2).幾驚你話結咗婚唔做嘢呀！大家有工作恩愛自然睇高一線啦。3).40歲後至有好運行，之前辛苦啲啫。 2127.本人姓吳、女性，想問:
1)今年年初轉工之後工作十分辛苦，工作量多，上司又情緒化， 做得好唔開心。 想問之後情況會否好轉、定係轉工比較好？2)另外我之後的事業運如何？ 鈞洋答：機月同梁白手興家命，早年辛勞晚年享福。1).唔知你挨得過11月嗰關否？今年轉不成工明年都要轉，否則公司唔掂、家人有劫。2).話明白手興家命、早年辛勞晚年享福，所以不到49歲幾難有安樂茶飯食。 2126.我叫阿瑩，女,
福建出世，我做銀行。上次得你指點要我注意工作中文件出錯，的確公司有文件出錯、我及其他同事用了一個月多才理順整件事，謝謝！現想問：1)最近有其他公司找我過檔，不知可否？2)你說過西方利我，如新公司要到星加坡工作，東南亞可否？3)我沒心長期在外工作，問
2 - 3 年後再回香港會失業嗎？ 鈞洋答：癸未日柱生九月，支會西方、時干透庚金，斗數命無正曜、機月同梁會照，事業巨門在午、太陽坐戌垣，太陰辰垣福德。1). 由於日月失位，一世人要離鄉別井先有好際遇，所以有其他公司揾你過檔，幾大「漯飯應」！2) 總之老闆唔係中國人都可以。3)
你條命嗰個金鑛犀利過IFC，直情係國家銀庫、唔講得笑！如果你會失業，咁大多數怕會餓死，哈哈！
2125.吳鈞洋師傅你好：本人男性，姓王、目前未婚，想請問何時才能結婚？未來妻子或者真命天女何時出現或者現在已經出現了嗎？我的孩子什麽時候會出生呢？未來妻子如何？ 鈞洋答：小王問愛，哈哈！你命宮天機守午垣，妻宮太陽坐羅網辰垣。如無看錯，真命天女很大機會在2012年左右欽點，我認為天女早在2005年後已經出現。結婚後33歲前你的小小王有機會面世。你妻子個性特強、好勝、詞鋒銳利，臉圓、白晢、近視。 2124.小弟叫陳Ｘ烯、男性， 小弟留意了你的網頁2年幾了，每每覺得你所批的甚為中肯、不會模稜兩可，也十分風趣幽默。
所以今次鼓起勇氣向你詢問，1:小弟本人適合做什麼職業？2:打了兩年工都覺得不受用，自問工作比其他同事落力，其他同事加了工資，我卻沒有..
請 問 什麼時候事業有起色，今年可否有機會轉工？3:什麼時候會有姻緣？ 鈞洋答：丙火陽光生冬令，你呢個太陽比起毛澤東就差得遠囉！冇光不特止、仲畀滔天巨浪沖到混混沌沌添！1).最適火土行業，如果間公司做呢啲生意都可以。2).牛耕田夠落力咯，誰叫你目前生緊金水運呢！你目前情形恰似紅太陽晚年柏金遜病一叉樣，你要過40歲後入咗巳午未南方先至有起色。今年好大機會轉工，明年就差啲。3).
武曲七殺守妻宮、殺陷兌宮個老婆認真巴辣，未來五年有機會，錯過咗就要等到40過後矣！ 2123.吳師傅、你好！本人姓葉、女性，想知來年會開始進入另一大運丙申運，不知未來十年大運如何？ 謝謝 鈞洋答：辛金命五行金強，用壬水吐秀兼通關，明年開始進入丙辛運，斗數則入咗武曲化忌限。你自己反而冇乜嘢，只係衰老公或男友啫！最大鑊咪分手囉，分唔成就剋佢嗰邊人口，講晤定佢自己出意外、犯官非。 2122.本人劉X雯、女性、香港出生，有結婚對象想問明年結婚如何？想問這2年買樓可行嗎?財運，事業如何？ 鈞洋答：八字甲申日柱生六月、五行火旺焚木，獨賴夫宮壬水長生申宮為用神。斗數中限巨門守田宅辰垣羅網，會太陽子宮，機月同梁夫宮祿科權三方四正。嗱！2011年于歸洞房係最吉，你命能旺夫、個夫亦有好嘢益你。只不過你因住一入門、嗰頭就有人大吉利是。明年年底可以買、2012利搬遷花費。 2121本人文Ｘ斌、男性，香港出世想問事業和姻緣…… 鈞洋答：阿斌哥，你今年啱啱轉入25歲大運，條命屬雨露癸水、生於九月，五行土旺過乜而將水索干索淨。用水幫身喜金生水，奈何五行欠水，所大利西方。斗數機月同梁、陽梁昌曲，祿科權三方四正，有天份利考試。職業適宜：教育、律師、寫作、設計……等等。大利西方姻緣，老婆叻、擅詞令有爭鋒才，30歲後有姻緣，或者會偷食卻識得抹咀……所以一妻可望到老。 2120.我叫Lin是女性，今年6月底因被小人所害而被炒。請問:
1.我2010年結束前能否找到工作？2.我的工作運何時轉好？怕長期失業…我40歲開始往後的運如何？ 鈞洋答：丁火生九月，天干透壬癸水、地支丑戌相刑。官殺混雜，全局缺火欠木。斗數天機陷丑垣、太陽太陰失位無光，機月同梁命。41歲前一路水鄉幾拾年，畀水沖到混混沌沌，如果有好運行不過流年冇水而矣，好似乞兒間中也有餐好飯餸一樣！去年之前四年天干旺火土梗好架，今年不幸庚金透干生壬癸水，唔被兜就有鬼！1).揾到也未必長久。2)41歲後開始轉好運，越老越好而大器晚成。 2119. 我叫劉永，男，生於山東省。想問一下我的婚姻和事業。我和現在的女朋友能否白頭偕老？我今年能當上大學教師嗎？我能否做出一番流傳後世的事業？另外，我的命中是否喜火？丙午丁未兩年皆是歲運並臨，是好是壞？ 鈞洋答：你的名字雖然普通卻響叮噹，如：香港著名演員，三國時期劉備的次子，國家羽毛球隊的隊員……等等都是這個名字。五行水寒正月，用火調候為先、次用木生火。目前行值巳火運、妻宮巳酉會而化用神，這幾年真命的「山東婆劉太」肯定出現，但是否目前的女友則被考起！我預測得到你35歲後有機會當上教授。「能否做出一番流傳後世的事業」？答案是可以的，由於五行用火、財與色。看來流傳後世的事業十居其九和女性有關。 2118.小女子姓伍、已婚、生活在香港。1)婚外情已三年，該名男子也已婚，有一女兒，現在住在紐約、是我最愛，我們認識了20年，2007時愛火重燃他常常前往亞洲商務旅行,他說他會回來香港或上海,我們何時結果？ 他會離婚嗎?和什麼時候？2)我會離婚嗎？和什麼時候？3)我會不會再婚？和什麼時候？4)我桃花一生都很重？ 鈞洋答：大山生夏令、四柱金旺極，係傷官配印格，本來條命幾鬼靚架，之不過傷官旺過頭、印星無能剋制，個 人明顯不安現狀而喜歡創新、革命..... 周不時五時花六時變，一哭二鬧三上吊……哈哈！至於自身斗數紫貪風月守命，陽巨（太陽、巨門）落陷子宮、一世剋男人。1)「陽巨陷子宮、最may兩頭空、金強易去勢、終極夏秋冬」好似你咁、強金入夫宮劈木（唔好彩命以木睇丈夫、情人……），以上首歌仔最應景喇！2)離倒婚係你老公好彩，離不成係你最愛有運……事關傷官守夫宮，50歲前肯定將佢哋斬草除根而冇剩！3)
65歲後先至行財運旺夫喎，瞓教喇！4)唉！一生桃花雖旺，唯獨桃花劫更多！ 2117.本人叫Corex、姓張、香港出生，女性， 請問健康、事業及財運？
這兩年身體不佳, 事業不順...好想請求師父幫忙看看. 鈞洋：辛金日元，地支現運寅申巳亥沖齊，斗數命宮坐天梁陷巳垣、原命子女，會照機巨卯酉，陰陽丑垣陽陷，六煞羊鈴併照，因住疴仔嗰戍有事、要被醫生摧殘肉體！仲有係不利婚姻，不離異必有刑剋。睇怕41歲前工作必然chi-cheurt咁轉冇時安定，仲有係家陣個運不利男人，小心三角關係、甚至被呃！ 2116.麻煩師傅幫忙批算本人一生中是否有兒女？如有請問將來兒女好不好，是否來報恩或報怨呢？鄧小姐 鈞洋答：應該問：係嚟報恩抑或攞債？我嘅答案係後者。點解釋呢？事關你庚辰日柱、庚辰時生冬令，第一，怕寒而忌水，咁啱條命又以水睇仔女，第二，子女宮犯伏吟、仲辰辰自刑添！問有冇？多數有嘅，之不過五行寒過我銀包，唔到37歲入火鄉幾難整得出！ 2115.本人姓林，小兒于陽曆2010年5月Ｘ日上午出生，請問大師小兒行運怎樣，起名用何五行？
鈞洋答：戊土生四月浩澣黃土、有如火焰山，少些水也不能種植、採礦，30歲前行火鄉運，一定多病多痛，適宜大西北生活。起名用金水筆畫、忌火土。 2114.吳師父：你好，來信多次未被抽中,
希望今次會被抽中本人。我是汶女、女性、本港出生，31歲後至今孤獨一人，都未有人喜歡過，好驚是孤獨終老。請問：(1)我是孤獨命嗎？ (2)如不是，何時會有真姻緣？對象大概會是一個怎樣的人呢？
(3)會有異地姻緣嗎？(4)多年來都是財來財去，有發達機會嗎？ 鈞洋答：汶女，汶川姑娘？又係驚嫁唔出，E家汶川姑娘多人鍾意，所以冇有怕……會禊灶罅！1).
五行用火、火聚夫宮，孤獨命？講笑嘛！2)今年應該有真命天子出現。對象略豐滿而幾穩重、幾慎重，亦幾重……哈哈！3)因為你第日要離開出生地發展，我諗至少有八成機會異地姻緣。4)
大富冇你份而中富可期，等40歲過後啦！
2113.本人姓葉、女性，想問師傅自己以後的健康及兩個兒子(及將來的媳婦)
是否孝順？另外母親年事已高及健康漸漸不佳，因工作關係我和她居住並不近及不能常常見面,
想問師傅她何時完壽好等我有準備？ 鈞洋答：條命傷官旺而天剋地沖，首先不利婚姻否則剋夫，但條命見到老公好咸濕、如果佢有阿二、咁就難為你矣！今年58歲，呢兩年你合咗個木同會咗木局、健康小心腫瘤和神經系統。至於兩個仔越係出外發圍越係好，佢哋極之獨立甚至反叛，反而同心抱相處得幾好。由於呢兩年命中不利女人，當然剋你老公嗰邊人先，至於你媽咪恐怕不能倖免，今明兩年都唔睇好。 2112.姓王，男性，獨子，甲戌年Ｘ月Ｘ寅時香港出生，現時在英國北部讀書，請問師傅他的讀書運如何？應向那一科發展？命格及未來運程如何？ 鈞洋答：五月水就算唔乾塘亦所剩無幾！條命勝在有庚金生亦有壬水助，唯獨五行沖到七彩，若然不離鄉別井留番響戍同個天鬥氣肯定冇運行，走去英國係首選、北部更有運。五行用金水，當然以持利器或口舌爭鋒至佳，咁即係：醫生、律師啦！其次先輪到設計、科技……。一世有運行，但同老豆無緣。 2111.本人叫Corex、姓張，香港出生，女性。請問健康、事及財運，一生人有沒有好運行？這兩年身體不佳，事業不順……好想請求師父幫忙看看。 鈞洋答：金水傷官用傷官，點解？因為通關息爭嘛！45歲先至有運行，財運不過不失但唔係大富嗰隻。41歲前行巳火運地支寅申巳亥沖齊、並且沖到七彩，離鄉別井先至冇事，否則首當其沖係婚姻，其次係健康。若然不過挨一刀而人口平安已經阿彌吉蒂還得神落。 2110.本人女性、姓名：劉Ｘ雯、出生:香港，有結婚對象想問明年結婚如何？問這2年買樓可行嗎？財運，事業(因現公司小人上司當道，想自知有不少貴人都冇用沒升識可能(因每年小人上司都會反對，現想轉工)如何？ 鈞洋答：明年命行紫貪，會照紅鸞天喜入夫宮，梗係可以結婚喇！只不過今年八字日柱天剋地沖、夫宮因此受傷，最好不過係老人家小病而子姪生育血光，否則真箇大家樂！2012年最適宜置業。你條命喜用金水，最利財經機構供職、猶利外資公司……否則冇運行。今年秋後調動，至於轉工抑或升職，睇落明年機會大啲。你條命要55歲後先至富有。 2109.老師您好。本人姓常，潮州出生，女，我想求問將來婚姻以及子女運會如何，之前有其他紫微老師說我36歲到46歲這十年大破家，是真的嗎？ 鈞洋答：娶老婆最好娶潮州嘅、對嗎？因為又靚又馴又慳家……。你都係啫！天梁守午垣會照殺破狼、雙祿、科權三方四正，專業人材、一世財豐祿厚，唯獨巨門化忌守夫宮會子垣太陽，如果非嫁出國絕不敢恭維，但子女宮卻不差。42一51歲十年行天同化忌對沖巨門化忌在羅網，剋夫家人口亦不利母系而矣！ 2108. 本人姓梁、兒子在英國出生，想問我應該要將他八字轉成香港時間嗎？另外我搞唔清佢係戌時定係亥時出世.
因當時當地係夏令時間,
不知是否要把時間減一小時？本人想知他的喜忌用神及性格取向，應該要向邊一方面栽培他，讓他能發揮所長？他有書緣嗎和孝順嗎？ 鈞洋答：點解要轉成香港時間呢？香港係造人始祖地抑術數發源地？如果嗰個月英國有夏令時間就必須減一小時囉！你個仔條係夏木用水喜金，出生在英國搵啱了地方。至性取向應該直嘅而唔蜷，性格取向係偏鋒事業：一係專業人材持利器謀生（醫生）、一係投資投機……。在歐美利書緣來香港冇運行。孝順、只不過一世受阿媽影響深、小心變裙腳仔。 2107.本人方小姐、生於香港，2008年結婚，09年離婚。請問何時再有真姻緣？再結婚會好嗎？是否好大機會嫁結過婚的男人？(之前有師傅贈過我兩句) 鈞洋答：結婚結婚，一結就婚（分），你條命夏水用水喜金，壬申一柱、夫宮係用神，唯肩劫在其中，加上太陽守命在子宮註定剋男人，唔單止二奶命、分分鐘大婆淪二奶，仲有、若唔嫁出外面幾難有夫伴老。要補充嘅本來應驗今年才婚變，因為夫宮三刑逢沖、不排除還有手尾未搞掂。 2106.本人姓馮、男性，香港出世，想問本人何時有機會創業及買樓呢？事業及財運如何？請指教。 鈞洋答：快喇，仲等多幾年啦！46歲後可以創業及買樓，係磚頭砌嘅真樓、唔似燒嗰種紙紥貨。事關你條命屬虛火而生八月，五行金水仲多過四川啲泥石流。46歲前你行緊水運、五行嘅還旺過廣東省書記汪洋，而你自身所屬之虛火、有如日本仔放響水上嘅招魂燈，分分鐘成了大海孤燈。嗱！亦好彩你丁巳日柱、下低有火，即係有老婆射住，呢兩年巳酉丑會入妻宮、唔知你明娶抑或包二奶喇，總之對方於你有着數啦！ 2105.姓名：林Ｘ怡、女、單身、台灣出生，詢問：1).工作近年運勢？
從事哪方面屬性工作最好？2).感情目前單身，是否該刻意追求？
3).目前從事房屋仲介業 是否該換行業？ 鈞洋答：丁亥日柱生正月，五行木火俱旺，八字稱之：木火通明格。略嫌五行缺金生水、兼劈木引火，運行火鄉縱使通明也有引火自焚之虞。1).目前行濕土洩火生木運，適宜優游自在工作，當然以費唇舌推廣最佳、又以外資機構有好際遇。2).
天梁化權守夫宮，要經歴挫折才有較完滿婚姻，還要嫁出國、對方年齡大你六七年以上最美滿。目前年紀仍有配額供你揮霍，可以不經意追求吖！3).從事房屋仲介業 或金融業都適合，反正現運懶懶散散、遲些日子才緊張吧！ 2104.ALICE C. 女，1).我咁大個人從沒有真正與人拍拖過，我好想拍拖，我好寂寞呀!
坦白講，我很想有一個男友解決我的性需要，但總是找不到對的人拍拖，實在太苦惱了！請問何時有真命天子出現呢？我的婚姻生活好(包括性生活)
嗎？2).我適宜打工、自僱或是創業？自覺工作上總是有無力感，總是發揮不到自己。謝謝你
! 祝安享晚年 ~ 鈞洋答：愛麗斯.
獅，乜你咁快祝我安享晚年嗱！我都想呀，唔使做嘛！但最衰患咗慢性病呢……乜病？荷包乾硬化囉！1).甲寅日柱、啲木咁鬼結實肯定斬崩刀。真唔好彩，你五行以金睇麻甩佬，除非搵鬼啦，佢哋金夠堅！否則有兩種遭遇，1.做二奶、就算大婆都要降一級。2.
性生活不恊調，事關你下面坐正寅木咁粗壯，若非西方金點劈得入下，分分鐘出事。2).
打外資機構工，持工具、利器，費唇舌推廣爭鋒，撈偏……等等行業都啱你。今年下半年唔差。 2103.張Ｘ怡、 女 、香港，詢問事項：1)愛情運本人已有固定男朋友，已一起5年，想知道與他的八字是否相合及能否結婚？2)事業財運本人是打工仔,但有興趣發展個人事業,,請問有否機會做生意？ 鈞洋答：金水傷官見官命、喜用木火財官。但條命天干地支都水火相沖而斗數七殺守命，乜鬼都好勝唔衰得！但往往卻自己破壞好事。1)外省女仔話齋你件「物件」水旺旺仲犀利過你多多，猶其水火相沖個人顯得戇質質成個郭靖款，但你條命忌水、水火則沖入夫宮……係！你E家對佢嗒哂糖，希望一世保持「少女情懷總是（春）喇！」否則呢位哥哥第時慘咯！好多男仔上頭短路都係咁因由。2)我諗你都係打工好過做生意，事關你個性五時花六時變，財運則三更窮五更富，做生意？除非食自己嗰隻，否則多多唔夠你蝕。 2102.本人女，名字馬Ｘ君， 問：本人已經多年沒有拍拖，並不是沒有追求者，只是一直覺得追求者不合適而沒有接受對方，我的命格是否出了什麼問題？為什麼總是無法投入一段感情？我今年快30歲了，因此，很擔心未來的姻緣是否也如此不濟！究竟何時才能遇到真命天子？ 鈞洋答：庚子日柱夫宮申子半會水局、27歲後入庚辰運、水旺滔天，命以火睇老公、成條消防喉響夫宮係咁射……仲慘過警察鎮壓示威者，咁鬼大水，除咗夏秋冬之外、係男人無不不爭相走備！事業善變不在話下，洞房有着落起碼37歲後，之前就算房洞得成、床板分分鐘被洞爛！ 2101.尊敬的吳鈞洋師傅你好了本人男性，姓名王Ｘ新，生於中國大陸正北方。想問大師一生財運，事業如何？虎年該注意那些事項，如有不順應該如何化解和今後的總體運成如何，如業等！
鈞洋答：丁巳日柱壬子時生申月，五行水旺壬水合丁合而不化，必須49歲入木鄉才有利好發展，一生利南方而忌北方。今年庚寅虎年，天干劈木而地支三刑逢沖，不利女性人口、除了婚變情變外更剋對方及家人，自己母系長輩也有意外。事業、工作多有變、也容易破財。 |